Իրանական Fars News լրատվական գործակալության փոխանցմամբ՝ Իրանը եվրոպական երկրներին նավթի մատակարարումը շարունակելու համար 3 նախապայման է ներկայացրել: Այս մասին հայտարարել է Իսպանիայի արդյունաբերության նախարար Խոսե Մանուել Սորիան:
Վերջինիս խոսքերով՝ իրանական այդ նախապայմանները ներկայացվել են Իրանում Իսպանիայի, Իտալիայի, Նիդերլանդների, Հունաստանի, Ֆրանսիայի ու Պորտուգալիայի դեսպաններին: Այդ երեք նախապայմաններն են. նավթային առաքումների ինքնարժեքի երաշխիքների ստացում, նավթի առաքումների վերաբերյալ երկարատև (3-5 տարով) պայմանագրերի առկայություն և այդ պայմանագրերից այն կետի հանում, որ ֆորս-մաժորային իրավիճակների դեպքում եվրոպական երկրներն իրավունք ունեն չեղյալ հայտարարելու Իրանի հետ նավթի առաքումների վերաբերյալ կնքած պայմանագրերը:
Հիշեցնենք, որ երկու օր առաջ իրանական Press TV հեռուստաալիքը հայտնեց, որ Իրանը դադարեցրել է եվրոպական 6 երկրներին (Հունաստան, Իտալիա, Իսպանիա, Պորտուգալիա, Նիդերլանդներ և Ֆրանսիա) իր նավթի մատակարարումը: Ավելի ուշ դա հերքվեց Իրանի նավթարդյունաբերության նախարարության կողմից:
