Ռուսական Regnum լրատվական գործակալության փոխանցմամբ՝ ներկայումս Թբիլիսին ու Անկարան բանակցում են Թուրքիայում վրացական տաճարների և Վրաստանում թուրքական մզկիթների վերականգնման շուրջ: Այդ ամենը սուր քննարկման առարկա է հանդիսացել երեկ տեղի ունեցած Վրաստանի խորհրդարանի նիստում:
«Քրիստոնյա-դեմոկրատների» առաջնորդ Գեորգի Տարգամաձեն հայտարարել է, որ Վրաստանը շնորհակալ է Թուրքիային՝ նրա ցուցաբերած աջակցության և Վրաստանի թիվ 1 առևտրային գործընկերը հանդիսանալու համար, սակայն պատմական հուշարձանների վերականգնման հարցում անհրաժեշտ է պահպանել հավասարություն և հաշվի առնել երկու կողմի շահերը: Տարգամաձեն Վրաստանի կառավարությանը կոչ է արել թուրքական կողմի հետ տարվող այդ բանակցություններում ներգրավել նաև պատրիարքարանին:
«Միասնություն հանուն արդարության» խմբակցության ներկայացուցիչ Ջոնդի Բագատուրիան հայտարարել է, որ Վրաստանում թուրքական մզկիթների կառուցմանը կհաջորդի նաև մեդրեսեների (հոգևոր դպրոց) կառուցումը: Նա հավելել է, որ Թուրքիան ոչ միայն քաղաքական ու տնտեսական, այլև գաղափարախոսական էքսպանսիա է իրականացնում Վրաստանում և մասնավորապես Աջարիայում:
Նա հիշեցրել է, որ Վրաստանն իր տարածքում արդեն իսկ կառուցել է 150 մզկիթ, սակայն փոխարենը ոչինչ չի ստացել, քանի որ Վրաստանը տվյալ հարցում որդեգրել է պարտվողական ու անպատասխանատու դիրքորոշում:
Հիշեցնենք, որ Վրաց պատրիարք Իլյա 2-րդը, ով խիստ դժգոհ է թուրք-վրացական վերոնշյալ բանակցություններում ներգրաված չլինելուց, մոտ 1 տարի առաջ պատմամշակութային հուշարձանների վերականգնման շուրջ նամակ է հղել Թուրքիայի վարչապետ Ռեջեփ Էրդողանին, սակայն վերջինս անպատասխան է թողել այդ նամակը:
