Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին ամերիկյան Կենտրոնական հետախուզական վարչության (ԿՀՎ) շտաբ-կայանում հանդիպել է այդ գերատեսչության ղեկավար, գեներալ Դևիդ Պետրեուսի հետ: Այս մասին հայտարարել է Վրաստանի նախագահի աշխատակազմը:
Վերջինիս հաղորդմամբ՝ Սաակաշվիլին ու Պետրեուսը քննարկել են փոխադարձ հետաքրքրության կենտրոնում գտնվող հարցերի լայն շրջանակ: Ամերիկացի գեներալը հայտարարել է, որ հպարտ է Իրաքում ու Աֆղանստանում վրացի զինծառայողներին ղեկավարելու համար:
Պետրեուսն ընդգծել է, որ վրացի զինծառայողներն օժտված են բարձր արհեստավարժությամբ և քաջությամբ, ինչում նա անձամբ է համոզվել:
Սաակաշվիլին իր հերթին հաստատել է Աֆղանստանում վրացական զինվորական կոնտինգենտի ուժեղացումը, ինչը ծառայում է վրացական բանակի ամրապնդմանը:
Հիշեցնենք, որ ներկայումս Վրաստանը պատրաստվում է ևս մեկ հետևակային գումարտակ ուղարկել Աֆղանստան:
