Եգիպտոսի հյուսիսում շենքի փլուզման հետևանքով մահացել է 12 և տուժել 33 մարդ: Այս մասին հայտնում է Al-Masry Al-Youm թերթի կայքը:
Եռահարկ շինությունը փլուզվել է երեքշաբթի երեկոյան Դումյատ քաղաքում` Կահիրեից 200 կմ հեռավորության վրա: Նախնական տվյալներով՝ ողբերգության պատճառը վերականգնման աշխատանքների ժամանակ շինարարության կանոնների խախտումներն են: Ականատեսների վկայությամբ` միջադեպից որոշ ժամանակ առաջ առաջին հարկում գտնվող խանութի սեփականատերը որոշել էր վերանախագծել իր տարածքը և հանել է մի քանի սյուներ, ինչն էլ խախտել են կառույցի կայունությունը:
Փլուզված շենքում էր գտնվում չափավոր իսլամիստական «Ալ-Վասատ» կուսակցության տեղական բյուրոն: Նրա ներկայացուցիչների խոսքերով՝ փլատակներ տակ են հայտնվել մի քանի կուսակցականներ:
Եգիպտոսում վերջին ժամանակներս հաճախակի են դարձել շենքերի փլուզումները` շինարարության կանոնները խախտելու և շենքի ոչ ճիշտ շահագործման հետևանքով: 2007 թվականին Ալեքսանդրիայում փլուզվել էր 12 հարկանի շենք. արդյունքում մահացել էր 28 մարդ:
