ՀՀ Ոստիկանության քրեական հետախուզության գլխավոր վարչության նախկին պետ, ոստիկանության գեներալ-մայոր Հովհաննես Թամամյանի գործով մեղադրող դատախազը լինելու Հարություն Հարությունյանը: Այս մասին «Առաջին լրատվական»-ի հետ զրույցում ասաց ՀՀ գլխավոր դատախազի մամուլի քարտուղար Սոնա Տռուզյան: Ըստ նրա՝ Հարություն Հարությունյանն է նախաքննության փուլում իրականացրել Հովհաննես Թամամյանի գործի նկատմամբ դատախազական վերահսկողությունը, և նա էլ դատարանում կներկայացնի մեղադրանքը:
Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանը Թամամյանի գործով առաջին դատական նիստը նշանակել է փետրվարի 17-ին:
Հիշեցնենք, որ Հովհաննես Թամամյանի գործը հունվարի 27-ին է ուղարկվել Կենտրոն և Նորք-Մարաշ վարչական շրջանների ընդհանուր իրավասության դատարան` ըստ էության քննելու համար:
Բացի Հ. Թամամյանից, գործով մեղադրանք է առաջադրված ևս երկու անձանց, որոնք նույնպես կալանավորված են: Նրանք են` ՀՀ ոստիկանության Երևան քաղաքի վարչության Արաբկիրի բաժնի պետի օպերատիվ աշխատանքների գծով տեղակալ Արմեն Պետրոսյանը և ՀՀ ոստիկանության քննչական գլխավոր վարչության հատկապես կարևոր գործերի քննության վարչության ՀԿԳ ավագ քննիչ Վահագն Խանզադյանը: Նրանք մեղադրվում են պաշտոնեական դիրքը չարաշահելու համար:
Հ. Թամամյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին և 2-րդ մասերով, Վ. Խանզադյանին և Ա. Պողոսյանին՝ ՀՀ քրեական օրենսգրքի 308-րդ հոդվածի 2-րդ մասով:
