Apple-ի նոր աշխատակիցներն աշխատանքի առաջին ամիսներին ընկերությունում ներգրավվում են այնպիսի ապրանքների մշակման մեջ, որոնք արտադրություն չեն մտնում:
Իրական առաջադրանքներ նրանց տրվում են միայն այն բանից հետո, երբ ղեկավարությունը համոզվում է, որ նրանք հուսալի են: Այդ մասին, ինչպես հաղորդում է Business Insider-ը, պատմել է ընկերության նախկին աշխատակիցներից մեկը: Վերջինիս խոսքերով՝ իր ընկերը կարիերան սկսել է Apple-ում «մտացածին» սարքեր մշակելով: 9 ամսվա ընթացքում նա պարբերաբար հարցազրույցներ է ունեցել: Այժմ նա ընկերությունում զբաղեցնում է առաջատար ինժեների պաշտոն:
Այսպիսի հայտարարություն հնչել է «Apple-ի ներսում» (Inside Apple) գրքի հեղինակ Ադամ Լաշինսկիի մամուլի ասուլիսի ժամանակ: Վերջինս Fortune ամսագրի գլխավոր խմբագիրն է և իր գրքում նկարագրել է Apple-ի ներքին կառուցվածքը: Նա պնդում է, որ նոր սարքի վերջնական տեսքի մասին իմանում են միայն ընկերության մի քանի աշխատակից: Աշխատակիցների մեծ մասը սովորական օգտատերերի նման առաջին անգամ սարքին ծանոթանում են նրա շնորհանդեսի ժամանակ:
Սթիվ Ջոբսը, որը ընկերությունը գլխավորում էր մինչև 2011 թ., յուրաքանչյուր խորհրդակցության ժամանակ հիշեցնում էր, որ ինֆորմացիայի արտահոսքի մեջ մեղավորները կհեռացվեն և իրավաբանական հետապնդման կենթարկվեն: