Ռուսական Независимая газета թերթի փոխանցմամբ՝ ուկրաինական պատվիրակությանը չի հաջողվել Դավոսում տեղի ունեցած Համաշխարհային տնտեսական ֆորումի շրջանակներում ստորագրել այնպիսի փաստաթղթեր, որոնք կնվազեցնեին Ռուսաստանից ունեցած գազային կախվածությունը:
Հեղուկացված գազի վերաբերյալ Ուկրաինայի և Ադրբեջանի միջև բանակցությունները դուրս են եկել եզրափակիչ փուլ, սակայն կասեցվել են Ադրբեջանի կողմից, որը ոչ պաշտոնապես դժգոհություն է հայտնել Սևծովյան տարածաշրջանում Կիևի վարած քաղաքականությունից:
Ռուսական թերթի աղբյուրները հայտնում են, որ ադրբեջանական կողմը հայտարարել է, որ եթե Ուկրաինան ցանկանում է գնել ադրբեջանական գազ, ապա պետք է հրաժարվի Հայաստանին զենք վաճառելուց:
Նշվում է, որ ուղիղ մեկ տարի առաջ ուկրաինական և ադրբեջանական պատվիրակությունները Դավոսի ֆորումի շրջանակներում ստորագրել են փաստաթղթեր, որոնցում նշված էր ադրբեջանական հեղուկացված գազի մատակարումների հարցում կողմերի միջև համագործակցության մտադրության մասին:
Խոսքն այն մասին էր, որ ադրբեջանական գազը Վրաստանի տարածքով հասնելու էր Սև ծով, որտեղից էլ լցանավերի միջոցով ուղղվելու էր դեպի ուկրաինական որևէ նավահանգստ, որտեղ էլ կառուցվելու էր հատուկ տերմինալ դրա ընդունման համար:
Սկզբնական շրջանում նշվում էր, որ հեղուկ գազի այդ մատակարարումների ծավալը կազմելու է տարեկան 5 միլիարդ խորանարդ մետր, սակայն իրավիճակը կտրուկ փոխվեց 2011 թվականի վերջին, երբ սրվեցին ռուս-ուկրաինական գազային հարաբերությունները:
Դրանից հետո ուկրաինացի չինովնիկները հայտարարեցին հեղուկ գազի ներկրման ծավալի մեծացման մասին, որը պետք է կազմի տարեկան 15 միլիարդ խորանարդ մետր: Անգամ նշվում էր, որ եթե ադրբեջանական պաշարները չբավականացնեին դրա համար, ապա երրորդ երկրները կարող են նույն երթուղով գազ մատակարարել Ուկրաինային:
Սկզբնական շրջանում նշվում էր, թե Ուկրաինայում այդ գազային տերմինալը շահագործման է հանձնվելու 2014 թվականին, սակայն ներկայումս Կիևում խոսում են ավելի ուշ ժամկետների մասին:
