ԱՄՆ-ը չի պատրաստվում քրեական պատասխանատվության ենթարկել Հայոց ցեղասպանության փաստը հերքողներին, ինչպես դա անում է Ֆրանսիան: Այս մասին պետդեպարտամենտի աշխատակիցների հետ հանդիպմանը հայտարարել է պետքարտուղար Հիլարի Քլինթոնը: «Միացյալ Նահանգների ուժեղ կողմերից մեկն այն է, որ մենք չենք պատժում մարդկանց իրենց ասածների համար: Մարդիկ կարող են ասել գրեթե ամեն բան, ինչ ցանկանան: ԱՄՆ-ում նրանք այդպես էլ անում են: Այլ երկրներ կարող են այլ ստանդարտներ և օրենքներ ունենալ: Բայց ես հույս ունեմ, որ մենք երբեք չենք պատժի որևէ մեկին իր արտահայտությունների համար»,- հայտարարել է նա:
Ինչպես հաղորդում է The Washington Post-ը, Քլինթոնն ավելացրել է, որ Հայոց ցեղասպանության ճանաչման հարցը պետք է որոշեն ոչ թե քաղաքական գործիչները, այլ պատմաբանները: «Պետությանը նման հարցերի լուծման մեջ ներքաշելը շատ վտանգավոր փորձ է»:
Քլինթոնը կոչ է արել հանրությանը քննարկումներ անցկացնել այդ հարցով: «Անհրաժեշտ է արտահայտվելու հնարավորություն տալ երկու կողմերին, և մենք կոչ ենք անում դա անել: Ապացույցներ հավաքեք, արտահայտեք ձեր փաստարկները և պատրաստ եղեք մասնակցել քննարկումներին»,- հայտարարել է Քլինթոնը:
Հիշեցնենք, հունվարի 24-ին Ֆրանսիայի Սենատը հավանության արժանացրեց Հայոց ցեղասպանության ժխտումը քրեականացնող օրինագիծը: Շուտով այն կներկայացվի երկրի նախագահ Նիկոլա Սարկոզիի հաստատմանը: