Ռոբերտ Քոչարյանը չի գլխավորի ԲՀԿ ցուցակը: Այդ բանը պարզ է դարձել ԲՀԿ նախագահի խոսնակ Խաչիկ Գալստյանի հայտարարությունից: Նա ասել է, որ ցուցակը գլխավորելու է Գագիկ Ծառուկյանը: Իսկ դա նշանակում է, որ Քոչարյանը ԲՀԿ ցուցակում չի լինի, որովհետև հազիվ թե նա լինի Ծառուկյանից հետո: Նույնիսկ հարցական է, թե արդյոք Ծառուկյանից հետո կլինի՞ Վարդան Օսկանյանը` Քոչարյանի «մույս» հավատարիմ զինակիցը:
Բանն այն է, որ ԲՀԿ-ն ոչ հերքում, ոչ էլ հաստատում է Օսկանյանի լինել-չլինելը, ինչը երևի թե նշանակում է, որ բավական սուր քննարկումներ են գնում պայմանների շուրջ: Այսինքն` ԲՀԿ-ն ըստ երևույթին այնքան էլ հեշտությամբ չի համաձայնում քոչարյանական պայմաններին, որոնց արտահայտիչն է անկասկած լինելու Վարդան Օսկանյանը ԲՀԿ ցուցակում, որովհետև անձամբ Օսկանյանին անկասկած այնտեղ ոչինչ պետք չէ:
Այս ֆոնին բավական հատկանշական է քոչարյանական ուղեծրի մեկ այլ ուժի՝ ՀՅԴ ղեկավար Հրանտ Մարգարյանի հայտարարությունն այն մասին, թե իրենք չեն մտածել Քոչարյանի մասին, սակայն անձամբ ինքը դեմ կլիներ, որ ՀՅԴ ցուցակը գլխավորեր Ռոբերտ Քոչարյանը: Իհարկե Մարգարյանը հայտարարել է, որ չի կարծում, որ Քոչարյանն ունի խորհրդարանի ընտրություններին մասնակցելու մտադրություն: Սակայն Մարգարյանի հայտարարությունը, որ ինքը դեմ կլիներ ՀՅԴ ցուցակը նրա գլխավորելուն, բավականին խորհրդանշական է:
Այսպիսով, ակնհայտ է, որ ԲՀԿ-ն և ՀՅԴ-ն այնքան էլ սիրահոժար չեն Քոչարյանին «քաղաքական ապաստան» տալու հարցում` ըստ երևույթին հասկանալով, որ դրանից տուժելու է իրենց վարկանիշը, և գուցե նաև հայտնվելու են Սերժ Սարգսյանի է՛լ ավելի անխնա հարվածների տակ: Մյուս կողմից, սակայն, իրականում հնարավոր է, որ Քոչարյանն ինքն է հրաժարվում ՀՅԴ-ի և ԲՀԿ-ի ծառայություններից` կամ չվստահելով այդ ուժերին, կամ էլ չտեսնելով դրանցում իր քաղաքական ծրագրերի համար ոչ մի պիտանի հեռանկար: Թեև, միգուցե երկրորդ նախագահը պարզապես փորձում է խորհրդարանական ընտրությունների ժամանակ ՀՅԴ-ն ու ԲՀԿ-ն պահել կուսական վիճակում, որպեսզի նրանց առավել լավ օգտագործի արդեն նախագահական կամպանիայի ժամանակ:
Լուսանկարում՝ Ռոբերտ Քոչարյանը Կորսիկայի ջրերում
