Կիրակի օրը վարչապետ Տիգրան Սարգսյանն ընտանիքի հետ այցելել է սպարապետ Վազգեն Սարգսյանի թանգարան, այնուհետեւ հյուրընկալվել է նրա հայրական տանը:
Վարչապետն այդ մասին այսօր գրել էր իր բլոգում:
«Գրետա մայրիկը զավակներիս մի չափազանց հետաքրքիր գրքույկ նվիրեց, որ կոչվում է՝ «Վազգենը»: Այս փոքրիկ գրքույկում Վազգենի ստորագրությամբ ավարտվող նրա մտքերը հրապարակվում էին առաջին անգամ: Գրքույկը ավարտվում է Վազգենի հետեւյալ խոսքով.
«Ես դեռ համոզված չեմ, թե վերջն ինչ է լինելու. ես Հանրապետական կուսակցության համագումարում էլ ասացի՝ հանրապետության առաջին նախագահ Լեւոն Տեր-Պետրոսյանը մեզ բոլորիս վրա շատ մեծ պատասխանատվություն թողեց՝ մենք դեռ պիտի ապացուցենք, որ ճիշտը մենք էինք այլ ոչ թե ինքը, եւ դափնիների հարցը դեռ վերջնականապես լուծված չէ»:
«Սիրելի Վազգեն,
Դու, քո զինակիցները, համախոհները, ընկերները եւ եղբայրները, որ մշտապես քո կողքին էին, ապացուցեցին, որ «դափնիների հարցը վերջնականապես լուծված է»: Ինչպես այն օրերին, այնպես էլ այսօր դափնիները քոնն են», – իր գրառումը այդպես է ավարտել Տիգրան Սարգսյանը:
