Google ընկերությունը պատասխանել է Ռուպերտ Մերդոկի` իր հասցեին արված «ծովահենության» մեղադրանքներին` դրանք անվանելով «անհեթեթություն»: Այս մասին հայտնում է CNET News-ը, վկայակոչելով Google-ից ստացած նամակը:
Google-ի ներկայացուցիչը պատասխանել է, որ միայն անցած տարի ընկերությունը որոնման համակարգից բացառել է հինգ միլիոն էջ, որոնք խախտել են օրենսդրությունը, ինչպես նաև ծախսել է 60 միլիոն դոլար` «վատ գովազդի» դեմ պայքարի համար:
«Մենք ամեն օր պայքարում ենք «ծովահենության» և կեղծարարությունների դեմ»,- ասվում է ինտերնետ-հսկայի հայտարարության մեջ:
Google-ը համարվում է «ծովահենության» դադարեցման օրենքի նախագծի (SOPA) դեմ պայքարող խոշորագույն ընկերություններից մեկը: Օրենքի նախագիծը նախատեսում է մի շարք խիստ միջոցների սահմանում կանոնները խախտող կայքերի դեմ: Օրենքի նախագծին դեմ են նաև Facebook, Twitter, Wikipedia և այլ ինտերնետ ընկերություններ:
Հիշեցնենք, որ News Corp. ընկերության ղեկավար Ռուպերտ Մերդոկը քննադատել է ԱՄՆ նախագահ Բարաք Օբամային և Google ընկերությանը այն բանի համար, որ նրանք հրաժարվել են աջակցել օրենքի նախագծին, որը թույլ էր տալու փակել կայքերը` «ծովահենության» դեմ պայքարելու նպատակով:
