«Ժառանգություն» կուսակցության ԱԺ պատգամավոր Ստեփան Սաֆարյանը դժվարանում է կանխատեսել, թե ինչ վճիռ կկայացնի Մարդու իրավունքների եվրոպական դատարանը hամապատասխանաբար 2005 և 2006 թվականներին ներկայացված երկու՝ «Չիրագովն ու մյուսներն ընդդեմ Հայաստանի» և «Սարգսյանն ընդդեմ Ադրբեջանի» հայցադիմումների մասով: Այս մասին նա ասաց «Առաջին լրատվական»-ի հետ զրույցում:
Հիշեցնենք, որ Մարդու իրավունքների եվրոպական դատարանը 2012 թվականի հունվարի 9-ին` ամբողջական քննության է ընդունել վերոնշյալ երկու գործերը: Հայցադիմումները հետաքրքիր են նրանով, որ առաջին անգամ միջազգային դատական ատյանը քննելու է ղարաբաղյան հակամարտության հետևանքների հետ կապված խնդիրներ` բացառապես իրավական հարթության մեջ: Մարդու իրավունքների եվրոպական դատարանը, փաստորեն, քննելու է արցախյան հակամարտության ժամանակ կրած վնասներին վերաբերող հայ ընտանիքի հայցն ընդդեմ Ադրբեջանի և հակառակը:
«Դժվար է ասել՝ թե ինչ վճիռներ կկայացվեն, արդյոք կպատժվե՞ն երկու պետությունները: Միաժամանակ, չմոռանանք, որ Եվրոպական դատարանը չի ասելու՝ Ղարաբաղը ձերն է, կամ Ղարաբաղը նրանցն է, կամ հողերը ազատագրված են, թե գրավված են: Նման գնահատականներ Եվրոպական դատարանը չի տալու: Նա իրավիճակն ընդամենը գնահատելու է իրավունքի պաշտպանության տեսանկյունից՝ որքանով են պետական ատյաններում պաշտպանվել նրանց իրավունքները»,- նկատեց Ստեփան Սաֆարյանը:
