Սպառողական գնաճը, 2010թ. դեկտեմբերի համեմատ, 2011 թ. դեկտեմբերին 4.7% է, պարենը` 2.9%, ոչ պարենը` 4.3%: Ինչպես այսօր ասուլիսի ժամանակ նշեց Ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը` ամենաբարձր գնաճն արձանագրվել է շաքարի ապրանքախմբում` 35.4%:
Նրա ներկայացմամբ` 2011 թ. նոյեմբերի համեմատ, 2011 թ. դեկտեմբերին գնաճը 2.5% էր: Միջին տարեկան ցուցանիշը, այսինքն` 2011 թ. հունվար-դեկտեմբերին, գնաճը 7.7% էր, պարենը տարվա ընթացքում թանկացել է 12.3%-ով, ոչ պարենը` 3.4%-ով, ծառայությունները` 3.6%-ով: 13 ապրանքային խմբից 11-ում արձանագրվել է գնաճ: 470 անուն ապրանքներից 339-ում արձանագրվել է գնաճ, 118-ը մնացել է անփոփոխ, 18-ը գնանկում է ապրել:
Ըստ Գ.Մարտիրոսյանի` վերջին տասը տարիների ընթացքում միայն 2005 թ.-ին է եղել 0.2% գնանկում:
ԱՊՀ երկրներում 2011 թ. 11 ամսում ամենացածր գնաճը Վրաստանում էր` 1.4%, ամենաբարձրը` Բելառուսում` 2 անգամ, Ռուսաստանում գրանցվել է 5.6% գնաճ, իսկ ԵՄ երկրների միջին ցուցանիշը 3.9% է:
ԱՎԾ ներկայացուցչի կարծիքով` Հայաստանը իր գնաճային ցուցանիշով նման է ԵՄ-ին:
Պատասխանելով «Առաջին լրատվական»-ի հարցին` արդյոք ԱՎԾ-ն պատրաստվո՞ւմ է հաշվարկել աղքատ, միջին և բարձր խավի համար տարբերակված գնաճ, Գ.Մարտիրոսյանը պատասխանեց` Հայաստանի ԱՎԾ-ն ներկայում ԵՄ «Թվինինգ» ծրագրի շրջանակներում համագործակցում է Դանիայի վիճակագրական ծառայության հետ, և մշակվում է հարմոնիզացված գների ինդեքսի հաշվարկ, որը համահունչ է ԵՄ երկրների գնաճին: «Ոչ հիմա, բայց ապագայում հնարավոր է` ունենանք տարբեր բյուջեների` ցածր, միջին և բարձր, համար գնաճի հաշվարկ»,- նշեց Գ. Մարտիրոսյանը:
