Մեր երկրի համար կրթված քաղաքացի ունենալն առաջնային նպատակ չէ: «Առաջին լրատվական»-ի հետ զրույցում նման տեսակետ հայտնեց «մենք դեմ ենք օտարալեզու դպրոցների բացմանը» քաղաքացիական նախաձեռնության անդամ, բլոգեր Արմեն Հովհաննիսյանը` խոսելով Հայաստանում հանրակրթության անհրաժեշտության և որակի շուրջ:
Նա նշեց, որ բոլորին է հայտնի, որ ձմռան ամիսներին դպրոցները չեն ջեռուցվում, մասնավորապես` շրջաններում, և դա պատճառ է հանդիսանում, որ ձմեռային արձակուրդները երկարաձգվեն: Դա, նրա համոզմամբ, հանրակրթության նկատմամբ պետության վերաբերմունքի հետևանքն է: Նա ցավով փաստեց, որ պետության համար կրթված քաղաքացի ունենալն առաջնային նպատակ չէ և, եթե դա այդպես է, ուրեմն կարելի է, որ դպրոցները չջեռուցվեն: «Այստեղ շատ կարևոր հարց կա, որ եթե պետականությունը կրում է ազգային և քաղաքացիական բնույթ, ապա շատ բնական է, որ հանրակրթությունն, այսինքն` քաղաքացու կրթությունը ,դառնում է առաջնություն: Ցավոք, մենք դա չունենք: Այն գիտելիքները, որոնք չենք ստանում այդ տարիքում, շատ անգամ երբեք հնարավոր չի լինում վերականգնել, ինչը ժամանակակից աշխարհում մարդուն դարձնում է պակաս մրցունակ, պակաս ունակ՝ հասկանալու, թե որտեղ է ապրում և ինչի համար»,- մեկնաբանեց Ա. Հովհաննիսյանը`հավելելով, որ հանրակրթությունը, ըստ ՀՀ Սահմանադրության, բացարձակապես գտնվում է պետության մտահոգության շրջանակներում: Ըստ նրա` դա համապետական խնդիր է, որովհետև այն երեխաները, որոնք սովորում են մեր դպրոցներում, պետք է հասունանան և դառնան պետության քաղաքացիներ: Նա ասաց, որ «եթե ընտանիքը երեխային դաստիարակում է որպես անհատականություն, ապա որպես քաղաքացի նրան դաստիարակում է դպրոցը»:
