«Մարզպետարանը միշտ երևում է, ոչ մի տեղ պախկված չէ»,- այսօր հրավիրված ասուլիսին հայտարարեց Արմավիրի մարզպետ Աշոտ Ղահրամանյանը` պատասխանելով լրագրողի դիտարկմանը, թե մարզում գործում են բազմաթիվ անօրինական ձկնաբուծարաններ, իսկ մարզպետարանը չի երևում:
Արդեն մի քանի տարի է` Բագարանում խմելու ջուր չկա. մարզպետը հայտարարեց, որ խնդրի լուծման համար բյուջեից ֆինանսական միջոցներ չեն հատկացվել, բայցև խոստացավ` հաջորդ տարի մի ծրագիր կգտնեն և խնդրին լուծում կտան` հավելելով, որ 2012 թ.-ին կլուծվի նաև ոռոգման ջրի խնդիրը:
Ըստ որոշ տեղեկությունների` Արմավիրի քաղաքային զբոսայգում ընթանում է Ռուբեն Հայրապետյանին պատկանող բանկի շինարարությունը: Ա.Ղահրամանյանը հայտարարեց, թե այդ շինարարությունն ընթանում է օրենքի շրջանակներում. «Գլխավոր հատակագծով այդ տարածքը տրված էր արտադրական ենթակառուցվածքների համար, և ես անգամ 1-2 տարի պահել եմ այգին, որ շինարարություն չկատարվի»: Նա նշեց, որ մարզպետարանը ծառատունկ է իրականացրել, նախատեսվում է քաղաքում ջրաշխարհ կառուցել:
Անդրադառնալով ԱԺ ԲՀԿ-ական պատգամավոր Ռուստամ Գասպարյանի տան վրա արձակված կրակոցներին՝ Ա. Ղահրամանյանը պնդեց, թե դրանք բոլորովին էլ Գասպարյանի տան մոտ չեն եղել, և Արմավիրում ՀՀԿ-ԲՀԿ լարվածություն չկա. «Եթե որևէ մեկը խուլիգանություն է արել և կրակել է, չի նշանակում, թե կուսակցությունների միջև լարվածություն կա»,- հայտարարեց Արմավիրի մարզպետը: