Իրանական ISNA լրատվական գործակալությանը տված հարցազրույցի ժամանակ Իրանում Հայաստանի դեսպան Գրիգոր Առաքելյանը հայտարարել է, որ Իրանինախագահ Մահմուդ Ահմադինեժադը Հայաստան է այցելելու դեկտեմբերի 23-ին։ Այդ այցը կայանում է Հայաստանի նախագահ Սերժ Սարգսյանի հրավերի հիման վրա։
Առաքելյանն ընդգծել է, որ Հայաստանի ու Իրանի քաղաքական հարաբերությունները գտնվում են բարձր մակարդակի վրա, ինչին նպաստում են բարձր մակարդակի փոխադարձ այցերը։
Ըստ Առաքելյանի՝ այս տարի 40 տոկոսով ավելացել է Հայաստանի ու Իրանի միջև ապրանքաշրջանառությունը՝ հասնելով 300 միլիոն դոլարի։ Նախորդ տարի այդ ցուցանիշը կազմել է 270 միլիոն դոլար։ Այս ցուցանիշն ավելի մեծանալու պոտենցիալ ունի։
Առաքելյանը հավելել է, որ երկկողմանի հարաբերություններում կարևոր տեղ է զբաղեցնում էներգետիկ ոլորտը։ Նախորդ տարիներին կառուցվել է գազատար և երկու էլեկտրահաղորդագիծ, իսկ երրորդ էլեկտրահաղորդագծի կառուցումն էլ շուտով կավարտվի և այն կհանձնվի շահագործման։
Ահմադինեժադը Երևանում քննարկելու է նաև նավթամուղի, երկաթգծի կառուցմանը և էներգետիկ նախագծերի իրագործմանն առնչվող խնդիրներ։
