«ՀԺ»-ն գրում է, որ Ախթալայի լեռնահարստացուցիչ կոմբինատի սեփականատեր Սերոբ Տեր-Պողոսյանը վերաքննիչ դատարան է բողոքարկել Լոռու մարզի դատարանի վճիռը՝ մանկապղծության համար իրեն 15 տարվա ազատազրկման դատապարտելու մասին:
Այդ մասին թերթին հայտնել է Տեր-Պողոսյանի փաստաբան Գիվի Հովհաննիսյանը:
«Տեր-Պողոսյանն ու նրա պաշտպանը պահանջում են բեկանել Լոռու մարզի ընդհանուր իրավասության դատարանի որոշումը և նրան արդարացնել Քրեական օրենսգրքի 139-րդ հոդվածով (սեքսուալ բնույթի բռնի գործողությունները), այսինքն՝ ամբողջությամբ: Հովհաննիսյանն ասաց, որ իրենց բողոքը դեռևս վարույթ չի ընդունվել: Ըստ նրա, օր օրի վատանում Է Տեր-Պողոսյանի առողջական վիճակը, նա տառապում է աղիքային անանցանելիությամբ և լուրջ բուժման կարիք ունի»,- ապա թերթը հավելում է.
«Տեր-Պողոսյանի պաշտպանները միջոցներ են ձեռնարկում, որ նրան բուժման տեղափոխեն քաղաքացիական հիվանդանոց: Առաջիկա օրերին սպասվում է բժշկական հանձնախմբի եզրակացությունը, որի հիման վրա Էլ ՀՀ ԱՆ քրեակատարողական վարչությունը համապատասխան որոշում կկայացնի: ՀՀ օրենքներով` կալանավորված անձը կարող է բուժում ստանալ քաղաքացիական հիվանդանոցում»:
