ՀՀ փոխվարչապետ, տարածքային կառավարման նախարար Արմեն Գևորգյանը ՏԿՆ ջրային տնտեսության պետական կոմիտեի նախագահ Անդրանիկ Անդրեասյանի, Ջրային տնտեսության զարգացման և բարեփոխումների ԾԻԳ-ի ղեկավար Ադիբեկ Ղազարյանի ուղեկցությամբ այսօր Կոտայքի, Արագածոտնի և Արմավիրի մարզերում ծանոթացել է Ոռոգման համակարգերի վերականգնման հրատապ լրացուցիչ ֆինանսավորման ծրագրով նախատեսված աշխատանքների մեկնարկին:
Ծրագիրն իրականացվում է Համաշխարհային բանկի աջակցությամբ ու ՀՀ կառավարության համաֆինանսավորմամբ և, ըստ էության, «Ոռոգման համակարգերի վերականգնման հրատապ ծրագրի» առաջին մասի շարունակությունն է:
Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին տեղեկացնում են, որ Կոտայքի մարզում փոխվարչապետն այցելել է Արզնի-Շամիրամի 1-ին հերթի ջրանցքի վերականգնման հատված: Ծրագրով նախատեսվում է վերականգնել 3,5 կմ:
Արագածոտնի մարզում Ա. Գեւորգյանը եղել է Արզնի-Շամիրամի 2-ին հերթի ջրանցքի տարածքում, որտեղ կվերականգնվի մոտ 5,5 կմ: Ստորին Հրազդան մայր ջրանցքի ներկա վիճակին և նախատեսվող աշխատանքներին փոխվարչապետը ծանոթացել է Արմավիրի մարզում: Ընդհանուր առմամբ` վերանորոգվելու է Ստորին Հրազդան ջրանցքի 5,3 կմ հատված: Վերոնշյալ տարածքներում աշխատանքներն արդեն մեկնարկել են:
Նշենք, այս ծրագրով նախատեսվում է մոտ 50 կմ երկարությամբ մայր և միջտնտեսային (գլխավոր) ջրանցքների վերանորոգում Արագածոտնի, Կոտայքի, Շիրակի, Լոռու, Արարատի և Արմավիրի մարզերում, և մոտ 63կմ երկարությամբ ներտնտեսային ոռոգման ցանցի ջրանցքների նորոգում Լոռու, Շիրակի, Գեղարքունիքի և Արմավիրի մարզերում: Ծրագրի լրացուցիչ ֆինանսավորման ընդհանուր արժեքը 21,6 մլն դոլար է, այն նախատեսվում է ավարտել 2013թ. հունիսին:
Այցի շրջանակում փոխվարչապետն Արմավիրի մարզպետ Աշոտ Ղահրամանյանի ուղեկցությամբ եղել է նաև Էջմիածնի վարչական տարածքում գտնվող «Բիգա» և «Ամստեր ֆլաուերս» ընկերություններում: Առաջինն զբաղվում է սնկի արտադրությամբ, երկրորդ ընկերությունը` հիմնականում տնկանյութերի աճեցմամբ:
ՀՀ կառավարության կողմից ընկերություններին արտոնություն էր տրամադրվել` 300 մլն դրամը գերազանցող ապրանքների ներմուծման դեպքում հաշվարկված ԱԱՀ -ի վճարման ժամկետը երեք տարի ժամկետով հետաձգելու վերաբերյալ: Դա նպաստել է ընկերությունների ընդլայնմանը:
«Բիգա» ընկերությունը ներկայումս իրականացնում է սնկի արտադրության նոր ծրագիր, որը կավարտվի գարնանը: Դա հնարավորություն կընձեռի գրեթե կրկնապատկել արտադրական ծավալները` ներկայիս օրական 800-1000 կիլոգրամից հասցնելով 1700-2000 կիլոգրամի: Արտադրանքի կեսից ավելին արտահանվում է:
«Ամստեր ֆլաուերս» ընկերությունում արդեն ավարտվել է ջերմոցային տնտեսության շինարարությունը, որն իրականացվել է հոլանդական տեխնոլոգիաներով և հոլանդացի մասնագետների ներգրավմամբ: Մշակվում է երեք տեսակի կուլտուրա` լոլիկ, վարունգ, պղպեղ, որոնց բերքը նախատեսվում է, որ 3-4 անգամ կգերազանցի սովորական արտադրողականության ցուցանիշը: Առաջին բերքը կստացվի արդեն հունվարին:
Ընկերությունը նպատակ ունի տեղական շուկան ապահովել թարմ բանջարեղենով, որը թե՛ որակով, թե՛ գնով ավելի մրցունակ կլինի, քան ներկրվող գյուղմթերքը: Երկու ընկերություններում, ընդհանուր առմամբ, կստեղծվի 30-35 նոր աշխատատեղ:
Ա. Գւորգյանը շրջայց է կատարել արտադրամասերում, ծանոթացավ պայմաններին, հնարավորություններին: Նա խրախուսելի է համարել գյուղատնտեսության ոլորտում առաջատար տեխնոլոգիաների կիրառումը` նկատելով, որ դրանք նպաստում են արդյունավետ գյուղատնտեսության զարգացմանը, նաև զբաղվածության ապահովման խնդրի լուծմանը:
Փոխվարչապետը հույս է հայտնել, որ ընկերության դրական փորձը տարածում կգտնի նաև այլ մարզերում:
