«Քաղաքացիական և միջազգային հետազոտությունների» կենտրոնը և ԱՄՆ ազգային ժողովրդավարական ինստիտուտը (NDI) այսօր «Կոնգրես» հյուրանոցում կազմակերպել էին քննարկում` «2012 թ. քաղաքական զարգացումների սպասումները» թեմայով:
«Ժողովրդավարական Հայրենիք» կուսակցության նախագահ Պետրոս Մակեյանը հակադարձելով ՀՀԿ-ական գործչի հավաստիացմանը, թե անցկացնելու են արդար ընտրություններ` նշեց, թե այդ դեպքում ինչո՞ւ չեն ընդունում Կոնգրեսի առաջարկները`Ընտրական օրենսգրքի առնչությամբ, ինչպես նաև խորհրդարանական ուժերի` «Ժառանգության» և Դաշնակցության առաջարկները:
Պետրոս Մակեյանը նշեց, որ այս տարի ՀԱԿ-ը գնաց մեղմ ճանապարհով` նպատակ ունենալով առանց ցնցումների գնալ առաջ, և Կոնգրեսը կարծում էր, որ նույն խելամտությունը կցուցաբերի նաև իշխանությունը, բայց իշխանությունը կեսճանապարհին կանգ առավ:
«Հանրահավաքները պակասեցին, որովհետև ընդդիմությունը վճռական կոչով չի դիմել հասարակությանը: Երբ ընդդիմությունը հանդես գա կոնկրետ առաջարկներով, կտեսնեք, որ 2008-ի փետրվարի 26-ի չափ մարդ կհավաքվի»:
ՀՀԿ պատգամավոր Գագիկ Մելիքյանը համարում է, որ հանրահավաքային մարող տրամադրությունները պայմանավորված են նրանով, որ հասարակության գիտակցության մակարդակը բարձրացել է, և այժմ հասարակությունը համախմբվել է Սերժ Սարգսյանի շուրջը:
Նա նշեց, որ ՀՀԿ-ն չի պարտադրում իրեն սիրել. «Բայց որևէ մեկին թույլ չենք տա վատություն անել ՀՀԿ-ին` չսիրելով, նախանձելով նրան. սա չի վերաբերում հասարակությանը»,- հայտարարեց ՀՀԿ-ական պատգամավորը:
ՀՀԿ-ական Գագիկ Մելիքյանը նշեց, որ Հայաստանում կան կազմակերպություններ, որոնք «գրանտակեր» են և հեղափոխություններ իրականացնելու հատուկ նպատակ են հետապնդում:
Պետրոս Մակեյանը հակադարձեց, որ հենց միջազգային կազմակերպություններն են ֆինանսավորում իշխանությանը, և պետք չէ մոռանալ, թե մեր գալիք սերունդների վզին ինչ արտաքին պարտք են թողել:
«Այսօրվա ընդդիմությունը եղել է իշխանության, հեղափոխություն է իրականացրել, բայց ո՞վ պարտադրեց քանդել երկրի տնտեսությունը»,- հռետորական հարց հնչեցրեց Գագիկ Մելիքյանը:
Պետրոս Մակեյանը պատասխանելով «երկիրը քանդելու» մեղադրանքին` նշեց, թե բոլորը գիտեն, թե ինչի արդյունքում է երկիրը քանդվել, քանի որ համակարգ է փլուզվել. «Այսօրվա նախագահը` Սերժ Սարգսյանը, եղել է նախկին իշխանության ներկայացուցիչ, նաև` Ռոբերտ Քոչարյանը»: