ՀԱԿ-ն անցած շաբաթ հայտարարել էր, որ պատրաստակամ է ազատ, արդար ընտրություններ անցկացնելու հարցում շահագրգիռ քաղաքական ուժերի հետ Ընտրական օրենսգրքում փոփոխություններ առաջարկող միասնական պլատֆորմ մշակել, ինչը հնարավորություն կտա բարձրացնել հարցը խորհրդարանում, ստանալ միջազգային հանրության աջակցությունը և հասնել օրենսդրական փոփոխությունների:
Հանրապետական կուսակցությունն անմիջապես բացառել էր նման հեռանկարը` հայտարարելով, թե Ընտրական օրենսգիրքն արդեն իսկ փոփոխված է:
«Բարգավաճ Հայաստան»-ի պատգամավորներն էլ հայտարարել են, թե կողմ են ազատ ու արդար ընտրություններին, բայց ռեալ չեն համարել իրենց կուսակցության մասնակցությունը ՀԱԿ-ի առաջարկած գործընթացներին:
Խորհրդարանական ընդդիմությունից «Ժառանգության» խմբակցության ղեկավարը Ստյոպա Սաֆարյանը «Ազատություն» ռադիոկայանի հետ զրույցում այսօր հայտնել է, թե ՀԱԿ-ից որևէ առաջարկ չեն ստացել: Երբ կոնկրետ առաջարկ ստանան, քննարկեն:
«Ազատությունը» հիշեցնում է, որ Դաշնակցության խորհրդարանական խմբակցության ղեկավար Վահան Հովհաննիսյանն էլ անցած շաբաթվա վերջին հայտարարել էր, թե ինչո՞ւ պիտի Դաշնակցությունը Կոնգրեսի առաջարկին միանա, թող Կոնգրեսը միանա իրենց առաջարկած պրոյեկտներին:
ՀԱԿ համակարգող Լևոն Զուրաբյանը երկուշաբթի «Ազատություն» ռադիոկայանի հետ զրույցում անդրադառնալով քաղաքական ուժերի այս հայտարարություններին` նշել է. «Իշխանությունների պատասխանը ընդամենը վկայակոչում է այն, որ նրանք իսկապես սիստեմատիկ կեղծարարությամբ են զբաղվել և պատրաստվում են նույն բանն անել այս ընտրություններին:Այսինքն որևէ ուրիշ բան այս իշխանություններից մենք չէինք էլ սպասում: Իսկ մնացած քաղաքական ուժերի արձագանքը ես համարում եմ այս պահին շատ նորմալ»:
Նրա դիտարկմամբ՝ նշված ընդդիմադիր քաղաքական ուժերից որևէ մեկը միանշանակորեն չի հրաժարվել միասնական պլատֆորմի գաղափարից:
Ի պատասխան Վահան Հովհաննիսյանի հարցադրմանը, թե երբ մեկուկես տարի առաջ Դաշնակցությունն ու «Ժառանգություն»-ը միավորեցին ուժերը` պայքարելու նոր Ընտրական օրենսգրքի համար, ինչո՞ւ էր ՀԱԿ-ը հեգնանքով ու ծաղրանքով վերաբերում և այդպես էլ չմիացավ դրան, Զուրաբյանը նշել է. «Մեր դիրքորոշումն այս հարցում պահպանվել է: Մենք անիմաստ ենք համարում մասնակցել իշխանությունների կողմից կազմակերպված քննարկումներին, որը թույլ է տալիս իշխանություններին լեգիտիմացնել այդ քննարկումները և ցույց տալ, որ իբր նրանց կողմից մշակված Ընտրական օրենսգրքի մեջ կա նաև ընդդիմության ներդրումը:
Խոսքը լրիվ այլ գործընթացի մասին է, գործընթաց, որում հավասար համագործակցության հետևանքով կմշակվի ընդհանուր պլատֆորմ, որը արդեն կներկայացվի հանրությանը, որը թույլ կտա արդեն ճնշումներ գործադրել իշխանությունների վրա»:
Դաշնակցության ներկայացուցիչը նաև հայտարարել էր, որ Կոնգրեսի` հատկապես վերջին ժամանակների նախաձեռնությունները ավելի շատ հակված են տպավորություն թողնել` ռեալ արդյունք բոլորովին չխոստանալով:
Ի պատասխան՝ Կոնգրեսի համակարգողը կոչ է արել զերծ մնալ փոխադարձ կշտամբանքներից։ «Ընտրությունների արդար և օրինական անցկացմամբ շահագրգիռ բոլոր քաղաքական ուժերը պետք է աշխատեն կենտրոնանալ պրակտիկ քայլերի վրա, և ճիշտ կլինի, որ մենք, այս գործընթացի հաջողությունը ապահովելու համար, զերծ մնանք փոխադարձ կշտամբանքներից»:
Հարցին` ընդդիմադիր ուժերի արձագանքը հույս ներշնչո՞ւմ է, թե պլատֆորմի ստեղծումը հնարավոր է, Զուրաբյանը ասել է. «Այս արձագանքը այս պահին որևէ խոչընդոտ չի ստեղծում նման գործընթացի ծավալման համար։ Կարող ենք գտնել այդ արձագանքների մեջ ինչ-որ պրոբլեմներ, բայց ոչ մի լուրջ խոչընդոտ քաղաքական ուժերի դիրքորոշման առումով ես չեմ տեսնում:
Կարևոր է սկսել համախմբումն այս ուղղությամբ: Եթե այդ պրոցեսը թափ հավաքի, ուրեմն վստահ եղեք, որ հետագայում շատ անսպասելի ուժերի աջակցությունն է հնարավոր դառնալու»: