Danske Bank-ի վերլուծաբանները հայտարարել են, որ Nokia հեռախոսային բիզնեսը կարող է մոտ ժամանակներս գնել Microsoft ընկերությունը:
Ինչպես հայտնում է Bloomberg գործակալությունը, հղում կատարելով վերլուծաբանների հայտարարությանը, գործարքը որոշակի իմաստ ունի: Սակայն ներդրումային բանկերի փորձագետները ներդրողներին խորհուրդ են տալիս չշտապել վաճառել ընկերության բաժնետոմսերը:
Danske Bank-ի հայտարարությունից անմիջապես հետո ֆիննական ընկերության բաժնետոմսերը թանկացել են 3,2 տոկոսով և այժմ գնահատվում են 3,97 եվրո՝ մեկ բաժնետոմսի համար:
Լուրերն այն մասին, որ Microsoft -ը կարող է ձեռք բերել Nokia ընկերությունը, տարածվել էին 2010 թվականին, սակայն ոչ մի պաշտոնական մեկնաբանություն չէր արվել: Այժմ Nokia-ում հերքում են ընկերության հեռախոսային բիզնեսի վաճառման լուրերը:
Ավելի վաղ հայտնի էր դարձել, որ 2012 թվականի ամռանը Nokia ընկերությունը պլանավորում է թողարկել պլանշետային համակարգիչներ, որոնք աշխատում են Microsoft ընկերության Windows օպերացիոն համակարգով: