Իռլանդիայի վարչապետ Մայքլ Նունան Bloomberg հեռուստատեսությանը տված հարցազրույցում ասել է, որ Իռլանդիան, որը ֆինանսական օգնություն է ստանալու ԵՄ-ից և ԱՄՀ-ից, հետագայում ևս եվրոգոտուն անդամակցելու հարցը կարող է որոշել հանրաքվեի միջոցով, որն անցկացվելու է հավանաբար գալիք տարվա գարնանը:
«Անցած ուրբաթ Բրյուսելում ԵՄ առաջնորդները գագաթնաժողովի ժամանակ պայմանավորվել են Բյուջետային կայունության միություն ստեղծել, որը ենթադրում է բյուջետային միջոցների ծախսերի և պետական պարտքի ծավալների վերահսկողության ուժեղացում: Նոր միության շրջանակներում նախատեսվում է երկրների դեմ սահմանել «ավտոմատ պատժամիջոցների» մեխանիզմ, որոնք խախտում են բյուջետային կարգապահությունը:
«Այն իրականում կարող է հանգեցնել շատ պարզ հարցի. «Դուք ցանկանո՞ւմ եք շարունակել մնալ եվրոգոտում, թե՞ ոչ»: Ես կարծում եմ, որ այս հարցը իռլանդացիները պետք է պարզեն հանրաքվեով»,- ասել է քաղաքական գործիչը:
Նա նաև նշել է, որ այս պահին դժվար է ասել՝ արդյոք երկիրն անցկացնելո՞ւ է հանրաքվե: Դրա մասին որոշումը կայացվելու է այն բանից հետո, երբ երկիրը ստանա Եվրոպայում Բյուջետային կայունության միության ստեղծման մասին փաստաթուղթը:
Ավելի վաղ Իռլանդիայի փոխվարչապետ Իմոն Գիլմորը հայտնել էր, որ երկիրը մտադիր է դիվանագիտական բոլոր միջոցները գործադրել, որ Մեծ Բրիտանիային վերադարձնի բանակցությունների սեղանի շուրջ` ԵՄ երկրների Բյուջետային միության ստեղծման համար:
Իռլանդիան եվրոգոտու այն երկրներից մեկն է, որը մեծ վնասներ է կրել ֆինանսական ճգնաժամի պատճառով: 2010 թ. նոյեմբերի վերջին Իռլանդիայի կառավարությունը, Էկոֆինը և Եվրոխումբը հաստատել էին ԵՄ-ից և ԱՄՀ-ից այս երկրին մինչև 85 միլիարդ եվրո ֆինանսական օգնություն տրամադրելու հարցը:
