Մարդու իրավունքների պաշտպանության առումով դեռ շատ խնդիրներ ունենք: Շատ անկատար ենք մենք` թե՛ յուրաքանչյուրս, թե՛ մեր պետությունը, թե՛ մեր արած գործերը: Մեր անկատարությունները բարդում ենք մեկս մյուսի, շրջապատի վրա, որի արդյունքում անհեթեթ իրավիճակների մեջ ենք հայտնվում: «Առաջին լրատվական»-ի հետ զրույցում ասաց թատրոնի և կինոյի դերասան Միքայել Պողոսյանը:
«Այնքան խնդիրներ կան մարդու պաշտպանության ոլորտում, որ չես հասկանում, որ ծայրից բռնես: Ինչ խոսք, անարդարություն կա, միգուցե դա բոլորիս մեղքն է: Ամենահեշտ բանը ինչ-որ մեկին մատնանշելն է»,- ասաց Մ. Պողոսյանը` հավելելով, որ հիմա ինքն այնքան զբաղված է իր աշխատանքներով, որ իրեն քաղաքացիական նախաձեռնություններով զբաղվելու ժամանակ, դժբախտաբար, չի մնում:
«Ես էլ իմ քաղաքականությունն եմ անում` կապված իմ արվեստի հետ: Ոչ մի տեղ ոչինչ չի լինում: Բոլորս կուզեինք, որ ավելի լավ լիներ, բայց այս են մեր ստեղծագործելու պայմանները: Տարբերակ է նաև ոչինչ չանելը, բայց ես ու իմ շրջապատը, բոլոր ստեղծագործողներս անում ենք մի բան, որը չէինք կարող չանել, ու կապ չունի` ո՞վ է մեր ղեկավարը: Մենք մեր ճանապարհով գնում ենք` հաղթահարելով բոլոր դժվարությունները»,- հավելեց դերասանը` ընդգծելով, որ դա էլ է պատերազմ. պատերազմական վիճակ է մշակույթում այն մարդկանց համար, ովքեր ուզում են ստեղծագործել:
