Մարդու իրավունքների խախտումները տեղի են ունենում պաշտոնատար անձանց կողմից: Այս մասին «Առաջին լրատվական»-ին ասաց «Ս. Դ. Սախարովի անվան մարդու իրավունքների պաշտպանության հայկական կենտրոն» ՀԿ իրավաբան Մերի Խաչատրյանը՝ Մարդու իրավունքների պաշտպանության միջազգային օրվան ընդառաջ անդրադառնալով ՀՀ մարդու իրավունքների պաշտպանությանը:
Նա նշեց, որ մարդու իրավունքների ոլորտում հայ հասարակության ամենամեծ ձեռքբերումը օրենքը խախտել և անպատիժ մնալն է: «Ստեղծվել է անպատժելիության մթնոլորտ. խախտումները տեղի են ունենում որոշ պաշտոնատար անձանց կողմից: Օրինական փաստաթղթերը հետագայում կարող են կորցնել իրենց ուժը և անվավեր ճանաչվեն, բայց այնուամենայնիվ այդ մարդիկ մնան անպատիժ»,- մեկնաբանեց իր տեսակետը Մ. Խաչատրյանը`որպես օրինակ ներկայացնելով Թռչկանի ջրվեժի վրա ՀԷԿ-ի կառուցման համար որոշ պաշտոնատար անձանց կողմից տրված դրական եզրակացությունները:
Խոսելով հասարակության վերաբերմունքի շուրջ` Մ. Խաչատրյանն ասաց, որ այսօր հասարակությունն ակտիվ է Հայաստանում. պայքարում, հասնում են որևէ բանի, բայց երևույթը չի վերանում: Իրավաբանն անդրադարձավ ոստիկանական ոլորտին`նշելով, որ շարունակվում են ոստիկանության ոլորտում առանց ծանուցագրի, առանց դատարանի որոշման մտնել մարդու բնակարան և ձեռքերը ոլորելով տանել:
«Թե՛ իրավապահ մարմինները, թե՛ պետական կառավարման մարմինները՝ իրենց գերատեսչություններով համատարած խախտումներ են անում: Դա գալիս է նրանից, որ Հայաստանում տիրում է համատարած անպատժելիության մթնոլորտ»,- նկատեց Մ. Խաչատրյանը`պատճառաբանելով, որ այն մարմինները, որոնք պետք է պաշտպանեն մարդուն, հովանավորվում են:
Մ. Խաչատրյանը կարծում է, որ պետք է իրավապաշտպան կազմակերպությունները, շահագրգիռ անձինք խորացնեն իրենց վերահսկողությունը, որը շատ կարևոր է:
