ԱՄՆ նախագահ Բարաք Օբաման դարձյալ կես տարով հետաձգել է Իսրայելում ամերիկյան դեսպանատան տեղափոխումը Թել-Ավիվից Երուսաղեմ:
Ինչպես հաղորդում է ИТАР-ТАСС-ը, ԱՄՆ պետքարտուղար Հիլարի Քլինթոնին ուղղված հուշագրում Սպիտակ տան ղեկավարը դա հիմնավորել է «ԱՄՆ ազգային անվտանգության շահերի պաշտպանության անհրաժեշտությամբ»:
ԱՄՆ դեսպանատունը Թել-Ավիվից Երուսաղեմ տեղափոխելու օրենքը Կոնգրեսում հաստատվել է 1995թ.: Սակայն Մերձավոր Արևելքում իրադրությունը չսրելու համար այն ժամանակվա ԱՄՆ նախագահ Բիլ Քլինթոնը, օգտվելով իր լիազորություններից, անընդհատ հետաձգում էր օրենքի իրանակացումը:
Այդպիսի քաղաքականություն էր վարում նաև Քլինթոնին փոխարինած Ջորջ Բուշ Կրտսերը: ԱՄՆ վարչակազմի ներկա ղեկավարը նույնպես անհրաժեշտ է համարում յուրաքանչյուր կես տարին մեկ հետաձգել օրենքի իրականացումը:
Երուսաղեմի կարգավիճակը պաղեստինա-իսրայելական հակամարտության ամենաառանցքային խնդիրներից մեկն է: Իսրայելը քաղաքի արևելյան հատվածը գրավել է 1967թ. պատերազմի ժամանակ և պնդում է, որ Երուսաղեմը Իսրայելի «միակ և անբաժան» մայրաքաղաքն է: Պաղեստինն իր հերթին ցանկանում է քաղաքի արևելյան հատվածը դարձնել իր ապագա պետության մայրաքաղաքը:
