ՀՀ կրթության և գիտության նախարար Արմեն Աշոտյանն այսօր ընդունել է ՀՀ-ում Ֆրանսիայի արտակարգ և լիազոր դեսպան Անրի Ռենոյին և աշխատանքային այցով մեր երկրում գտնվող Ֆրանսիայի արտաքին գործերի նախարարության համալսարանական և գիտահետազոտական հարցերի պատասխանատու Էլեն Դյուշենին:
Հանդիպմանը քննարկվել են հայ-ֆրանսիական կրթական համագործակցությանն առնչվող հարցեր, կարևորվել է հատկապես Հայաստանի ֆրանսիական համալսարանի գործունեությունը:
Ֆրանսիայի արտգործնախարարության ներկայացուցիչն ընդգծել է, որ ֆրանսիական կողմի համար կարևոր է Հայաստանի կրթության և գիտության նախարարության գնահատականն ու մեկնաբանությունը Հայաստանում Ֆրանսիական համալսարանի աշխատանքի արդյունավետության վերաբերյալ:
Շեշտելով, որ Ֆրանսիական համալսարանը մեր բարձրագույն կրթության համակարգի առաջատարներից է, ՀՀ ԿԳ նախարարը նշել է, որ այն բուհական համակարգում մեր ապագայի լավատեսության աղբյուրներից մեկն է:
Նախարարը կարևորել է , որ ֆրանսիական համալսարանն ընդլայնի համագործակցության շրջանակը Ֆրանսիայի բարձրագույն կրթական հաստատությունների հետ, ինչը հնարավորություն կտա բարձրացնել Ֆրանսիական համալսարանի տարածաշրջանային մրցունակությունը:
Հանդիպմանն անդրադարձ է եղել նաև Հայաստանում Ֆրանսիական լիցեյի հիմնադրմանը, որի առաջարկը հնչել է Հայաստանի և Ֆրանսիայի նախագահների պաշտոնական հանդիպման ժամանակ:
ՀՀ ԿԳ նախարարը տեղեկացրել է, որ այժմ մշակվում է Ֆրանսիական լիցեյի հիմնադրման միջպետական պայմանագրի նախնական տարբերակը` համաձայն ՀՀ օրենսդրության պահանջների:
