Միջազգային խոշորագույն մեդիամագնատ ավստրալացի Ռուպերտ Մերդոկը և բրիտանացի միլիարդատեր Virgin Group խմբի սեփականատեր Ռիչարդ Բրենսոնը պատրաստվում են ստեղծել նոր պարբերականներ, որոնք նախատեսված կլինեն միայն iPad պլանշետային համակարգիչների համար:
Ինչպես հաղորդում է The Financial Times պարբերականը, նոյեմբերի 30-ին Նյու Յորքում Բրենսոնը կանցկացնի Project անվանմամբ ամսագրի շնորհանդեսը: Նոր պարբերականի հիմնական թեմաները կլինեն ժամանցին և շոու-բիզնեսին, միջազգային մշակույթին, բիզնեսին և ճանապարհորդությանը վերաբերող նյութերը: Ամսագրի գլխավոր մենեջերն է սեփականատիրոջ 29-ամյա դուստրը` Հոլլի Բրենսոնը, գլխավոր խմբագիրը` Էնթոնի Նոգերան, որը նախկինում գլխավորում էր FHM ամսագիրը:
Դեկտեմբերի սկզբին Մերդոկին պատկանող News Corp. ընկերությունը պատրաստվում է ներկայացնել Daily ինտերնետային օրաթերթը, որը գալիք տարվա սկզբին հասանելի կլինի միայն ԱՄՆ-ի iPad օգտատերերին: Թերթի համար գրանցվելու արժեքը կկազմի շաբաթական 99 ցենտ: Այս նախագծի համար Մերդոկի ընկերությունը ներդրել է 30 մլն դոլար: Ընկերությունում աշխատելու համար արդեն հավաքվել է շուրջ 100 լրագրող:
Երկու պարբերականներն էլ հնարավոր կլինի ընթերցել միայն iPad համակարգիչների հատուկ ծրագրի միջոցով: Դրանք «թղթային» տարբերակով չեն հրատարակվի, ինչպես նաև հասանելի չեն լինի համացանցում սովորական դիտարկիչների միջոցով:
