«Անկախ Հայաստանի պատմության մեջ առաջին անգամ կառավարությունը լուր է տարածում, թե իրեն սպառնում են»,- այսօր լրագրողների հետ հանդիպման ժամանակ խոսելով ուրբաթ օրը կառավարության կայքում տեղադրված հայտարարության մասին, թե ՀՌԱԿ ատենապետ Հարություն Առաքելյանը սպառնում է վարչապետին ու արդարադատության նախարարին` նշեց ՀՌԱԿ ատենապետ Հարություն Առաքելյանը:
Նա ասաց, որ վարչապետն իր լրատվական ծառայության միջոցով հայտարարություն է տարածում այն ժամանակ, երբ ինքը գնացել էր Վրաստան. «Ղզիկի պես փախնում է ու նման հայտարարություն անում` տպավորություն ստեղծելով, թե ինքը Վրաստանում կարևոր պայմանագրեր է ստորագրում, իսկ Հայաստանում իր վրա ցեխ են շպրտում: Բայց ես սպասեցի` մինչև նա գա, որ նոր խոսեմ»:
Առաքելյանը տեղեկացրեց, որ այդ ֆաքսերը կառավարություն ինքն է ուղարկել, բայց կառավարության կայքում դրանք կիսատ են տեղադրված, և կարևոր դրույթները նշված չեն:
Նա լրագրողներին ներկայացրեց իր ուղարկած ֆաքսերն ամբողջությամբ և նշեց, որ այդ ֆաքսերը կանխամտածված է ուղարկել. «Ես շանտաժ չեմ արել, ոչ էլ սպառնացել եմ, այլ արդարադատության նախարարին ներկայացրել եմ իմ հետագա քայլերը: Ի՞նչ է, երբ մարդը խոսում է օրենքների մասին, շանտա՞ժ է անում: Սա զավեշտ է, երբ կառավարությունը դիմում է մամուլին, թե` եկեք մեզ փրկեք: Իսկ եթե շանտաժ է, օրենք կա` թող կիրառեն»:
Հարություն Առաքելյանը նկատեց, որ շանտաժ իրականացնում է հենց արդարադատության նախարարությունը ՀՌԱԿ-ի նկատմամբ` չհաստատելով ՀՌԱԿ վերջին համագումարի որոշումը իր ատենապետության վերաբերյալ:
«Հիմա Սասունցի Դավիթը գալիս է ու ասում` ով քնած ա, արթուն կացեք, ի՞նչ է, դա շանտա՞ժ է: Ես չեմ ուզում ինձ Սասունցի Դավթի հետ համեմատել, բայց կառավարությունը լրիվ Ցռան Վերգոյի կարգավիճակում է հանդես գալիս»:
Նա նաև տեղեկացրեց, որ իրեն հրավիրել է Կենտրոնի դատախազության դատախազ Խաչիկյանը և սպառնացել` եթե շարունակեն իրենց հանրային գործունեությունը, ապա հետագայում լավ չի լինի. «Ստացվում է Խաչիկյանները միայն ֆիլմերում չեն խայտառակում ռեսպուբլիկան»:
Հարություն Առաքելյանը նշեց, որ իր ատենապետությունը արդարադատության նախարարությունը չի հաստատում, որովհետև տարիներ շարունակ ինքը խոսել է «Նաիրիտի» հարցում վարչապետի իրականացրած անօրինական քայլերի մասին. «Հիմա էլ վարչապետն ինձ գցել է նեղը ու իր ընկերոջ`անարդարության նախարարի միջոցով չի ուզում հաստատել իմ ատենապետությունը»:
Ըստ Առաքելյանի` ՀՌԱԿ նախկին ատենապետ Էդվարդ Անտինյանը, որը կիրովականցի է ու վարչապետի եղբայրների ընկերը, իր դեմ է գործում. «Փաստորեն, կիրովականցիների մաֆիան պայքարում է իմ դեմ, որպեսզի ես չխոսեմ «Նաիրիտում» կատարված անօրինականությունների մասին»:
