Իրանական Fars News լրատվական գործակալության փոխանցմամբ՝ Իրանն ԱԷՄԳ-ին մեղադրել է իր հանդեպ ստանձնած պարտավորությունների չիրագործման մեջ, ինչի արդյունքում ֆիզիկական ոչնչացման սպառնալիքի տակ են հայտնվել երկրի ատոմագետ ֆիզիկոսներն ու երկրի միջուկային օբյեկտները։
Այս մասին նշված է ԱԷՄԳ-ում Իրանի մշտական ներկայացուցիչ Ալիս Ասկեր Սոլթանիեի՝ ԱԷՄԳ-ի գլխավոր տնօրեն Յուկիյա Ամանոյին հասցեագրած պաշտոնական նամակում։ Դրանում նշված է, որ Ամանոն դավաճանել է ԱԷՄԳ-ի հետ բանակցություններին մասնակցող և նրա հետ համագործակցող ատոմագետ ֆիզիկոսների ու մասնագետների անվանացանկի չհրապարակման հարցում.
«Այդ իրանցիների անունները ներառվել են ԵՄ-ի ու ՄԱԿ ԱԽ-ի «սև» ցուցակներում և նրանց նկատմամբ սահմանվել են ապօրինի պատժամիջոցներ։ Մյուս կողմից՝ այդ ցանկը հայտնվել է ահաբեկչական խմբավորումների ձեռքում, որոնց աջակցում են ԱՄՆ-ի ու Իսրայելի հատուկ ծառայությունները։
Արդյունքում, համայն աշխարհն ականատես դարձավ Իրանի տարածքում իրականացված մի շարք ահաբեկչությունների, որոնց զոհ գնացին իրանցի ազդեցիկ գիտնականներն ու նրանց հարազատները։ Այդ ամենը հաստատում են ձերբակալված ահաբեկիչների խոստովանության մասին պատմող տեսանյութերը։ Հրապարակելով իրանցի մասնագետների անվանացանկը՝ ԱԷՄԳ-ը նրանց վերածել է ահաբեկիչների ու ԱՄՆ-ի և Իսրայելի հատուկ ծառայությունների թիրախի։
Ձեր վերջին զեկույցը պարունակում է իրանցի ատոմագետ ֆիզիկոսների անվանացանկն ու Իրանի միջուկային օբյեկտների գտնվելու վայրերը, ինչը հակասում է միջազգային նորմերին ու ԱԷՄԳ-ի համապարփակ երաշխիքների մասին համաձայնագրին։ ԱԷՄԳ-ի անդամ ավելի քան 100 երկրներ դեմ են արտահայտվել այդ տեղեկատվության հրապարակմանը, սակայն Դուք դա անտեսել եք։
Բացի այդ, անհրաժեշտ է ընդգծել, որ ԱԷՄԳ-ի ղեկավար խորհուրդը որևէ կերպ չի պնդել Ձեր զեկույցում տեղ գտած այդ տեղեկատվության հրապարակման վրա։ Այդպիսով, իրանցի մասնագետների ու նրանց հարազատների անվտանգության, ինչպես նաև Իրանի միջուկային օբյեկտների նկատմամբ հնարավոր դիվերսիաների ողջ պատասխանատվությունն ընկնում է Ձեզ վրա»։
Հիշեցնենք, որ այսօր ԱԷՄԳ-ի ղեկավար խորհրդում քվեարկության է դրվելու Իրանի միջուկային ծրագրի վերաբերյալ բանաձևը։