Հայաստանում ԱՄՆ-ի դեսպան Ջոն Հեֆերնը YouTube-ում բացել է իր անձնական վիդեոբլոգը: Այս մասին տեղեկացնում է «Ազատություն» ռադիոկայանը:
Վիդեոբլոգի առաջին տեսանյութում դեսպանը և նրա կինը` Լիբբի Հեֆերնը խոսում են Հայաստանում իրենց առաջին հանդիպումների մասին: Դեսպանը, մասնավորապես, ասում է, որ Հայաստանը եւ ԱՄՆ-ը հպարտանում են երկու երկրների կառավարությունների միջև ձևավորված գործընկերությամբ:
«Որպես Միացյալ Նահանգների դեսպան` իմ նպատակն է առավել խորացնել և ընդլայնել մեր արդեն իսկ ամուր գործընկերությունը Հայաստանի ևՀայաստանի ժողովրդի հետ տարբեր ոլորտներում», – ասում է դեսպանը:
Նա նաև պատմում է, որ հանդիպումներ է ունեցել քաղաքացիական հասարակության տարբեր անդամների հետ: Դեսպանի խոսքով` իրենց համար առավել տպավորիչ է եղել պատանի ձեռներեցների մասնակցությամբ միջոցառումը, որտեղ պատանիները ներկայացրել և վաճառել են իրենց պատրաստած ապրանքները: Լիբբի Հեֆերնը ցույց է տալիս իր ականջօղերը և էջանիշեր, որ ձեռք են բերել միջոցառման ընթացքում:
«Լիբբին և ես շնորհակալ ենք հայերին ջերմ հյուրընկալության համար», – տեսանյութում հայերենով ասում է դեսպանը և հավելում, որ հայերեն դեռ սովորում է և հույս ունի, որ հաջորդ շաբաթ ավելի լավ կստացվի:
Ջոն Հեֆերնը իր պաշտոնը ստանձնել էր հոկտեմբերի 17-ին` փոխարինելով ԱՄՆ-ի նախկին դեսպան Մարի Յովանովիչին:
