«Ամերիաբանկն» իր ռազմավարական ծրագրերն իրականացնում է և հիմնական ցուցանիշներն ապահովված են: Նման հայտարարություն այսօր լրագրողների հետ հանդիպման ժամանակ արեց «Ամերիաբանկ» ՓԲԸ Զարգացման գծով տնօրեն Տիգրան Ջրբաշյանը: Նրա խոսքով՝ երրորդ եռամսյակի վերջի դրությամբ բանկի ակտիվները կազմել են 198.7 մլրդ դրամ` ապահովելով տարեկան մոտ 25% աճ:
Բանկի պարտավորությունները երրորդ եռամսյակի ընթացքում կազմել են 157.2 մլրդ դրամ (աճը՝ 30%), վարկային ներդրումները՝ 128.2 մլրդ դրամ (աճը՝ 42%), շահույթը՝ 2.9 մլրդ դրամ, ժամկետային ավանդները՝ 88 մլրդ դրամ (աճը՝ 27%): Տ.Ջրբաշյանը հայտնեց, որ ֆիզիկական անձանց ուղղված համապատասխան կամպանիա են նախաձեռնում, որը կսկսեն առաջիկա երկու շաբաթների ընթացքում:
«Վարկային պորտֆելը 128.2 մլրդ դրամ է սեպտեմբերի 31-ի դրությամբ, իսկ տարեվերջին իրատեսական է 130-140 մլրդ դրամը»,- ասաց Տ.Ջրբաշյանը՝ նշելով, որ դրամային ավանդների ծավալների աճի տեմպերը գերազանցում են դոլարայինը, ինչի պատճառը նաև աշխարհում տիրող անորոշությունն է, և մարդիկ փորձում են դիվերսիֆիկացնել իրենց ավանդների պորտֆելները: Այնուամենայնիվ դոլարային ավանդների ծավալները շարունակում են գերակշռող մնալ:
Տ.Ջրբաշյանը տեղեկացրեց, որ նոյեմբերին կբացվի բանկի Կոմիտասի մասնաճյուղը, ընթացքում է Շենգավիթի մասնաճյուղի շինարարությունը. «Վանաձորի և Մոսկովյանի մասնաճյուղերն իրենց արդյունքն արդեն տալիս են»:
