Եվրոպայի ամենահարուստ կինը` L’Oreal ընկերության ժառանգ, 88-ամյա Լիլիան Բետանկուրը դատարանի կողմից ճանաչվել է անաշխատունակ և հանձնվել է իր ընտանիքի խնամակալությանը: Այդ մասին հոկտեմբերի 17-ին հայտնել է AFP գործակալությունը` հղում անելով միլիարդատիրոջ աղջկա փաստաբանին:
Աղբյուրի հավաստմամբ` բժիշկները Բետանկուրի մոտ աշխտորոշել են «խառը տիպի թուլամտություն» և Ալցհեյմերի հիվանդության ծանր աստիճան:
Բացի այդ, կինը չի կողմնորոշվում տարածության մեջ, դժվարությամբ է հասկանում այն, ինչ կատարվում է շրջակայքում, ունի նաև թեթև աֆազիա` խոսքի ընդհատում:
Այս ամենը նշանակում է, որ նա ի վիճակի չի այլևս տնօրինել իր կարողությունը, որը գնահատվում է 20 միլիարդ եվրո: Բետանկուրի խնամակալ է նշանակվել նրա ավագ թոռը` Ժան Վիկտոր Մեյերսը: Իսկ նրա գործերով կզբաղվեն դուստրը` Ֆրանսուա Բետանկուր Մեյերսը և երկու թոռները:
Նշենք, որ դատից մի քանի օր առաջ Լիլիան Բետանկուրը հարցազրույց էր տվել Journal du dimanche թերթին` հայտարարելով, որ եթե դատարանը իր խնամակալությունը հանձնի դստերը, ապա ինքը կլքի Ֆրանսիան:
