Ադրբեջանական Turan լրատվական գործակալության փոխանցմամբ՝ Մարդու իրավունքների հարցով Եվրոպայի խորհրդի կոմիսար Թոմաս Համարբերգը Ստրասբուրգում արած իր հայտարարությամբ անդրադարձել է բռնություններից լրագրողների պաշտպանության խնդրին։
Համարբերգը նշել է, որ վերջին տարիներին Եվրոպայում բազմաթիվ առաջատար լրագրողներ դարձել են դաժան սպանությունների զոհեր։ Խոսքը մասնավորապես վերաբերում է Հրանտ Դինքի (Թուրքիա), Գեորգի Գոնգաձեի (Ուկրաինա), Էլմար Հուսեյնովի (Ադրբեջան) և Աննա Պոլիտկովսկայայի (Ռուսաստան) սպանություններին։
Համարբերգն ընդգծում է ոչ միայն բուն սպանություններն իրականացնողներին, այլև նրանց պատվիրատուներին հայտնաբերելու և պատժելու անհրաժեշտությունը։ Ընդհանուր առմամբ, 1992 թվականից ի վեր եվրոպական երկրներում իրենց մասնագիտական գործունեության համար սպանվել է ավելի քան 100 լրագրող։ Շատերն էլ ենթարկվել են ֆիզիկական բռնությունների կամ սպառնալիքներ ստացել։
Համարբերգը նշել է, որ լրագրողների սպանությունների մեծ մասի դեպքում սպանություններն ամբողջովին չեն բացահայտվում, ինչը կասկածի տակ է դնում իրավապահ մարմինների և դատական համակարգի գործունեության արդյունավետությունը։
Ըստ Համարբերգի՝ անկախ և բազմակարծ ԶԼՄ-ների առկայությունը յուրաքանչյուր գործող ժողովրդավարության առանցքային տարրերից է։
