«Կայուն ներքաղաքական վիճակ է, բնականաբար, որոշակի լարվածություն պետք է լինի, քանի որ մոտենում է ընտրությունների պահը, և քաղաքական ուժերը փորձելու են մեծացնել էլեկտորատը»,-այսօր լրագրողների հետ հանդիպման ժամանակ հայտարարեց ԲՀԿ-ական պատգամավոր Վարդան Բոստանջյանը: Նա նշեց, որ անկախ ցանկություններից` ձայների բաժանումը տեղի կունենա հիմնական քաղաքական ուժերի միջև, միաժամանակ` Բոստանջյանը հավաստիացրեց, որ «Բարգավաճ Հայաստանը» ջղաձգություններ չունի և իրեն հանգիստ է պահում ընտրություններից առաջ:
Բոստանջյանի բնորոշմամ` ՀԱԿ-ը «ավելի մեծ ձգտումներ ունեցողների տեղամաս է, նեղացածների զանգված է, որ պահանջում է խնդիրների լուծում` հաշվի չառնելով երկրի ունեցած ռեզերվների սահմանափակությունը»: Պատգամավորի կարծիքով` ՀԱԿ-իշխանություն երկխոսությունն առկախվեց ընդդիմության կողմից, իշխանությունը խնդիր չունի շարունակել երկխոսությունը:
Անդրադառնալով Ռուսաստանում տեղի ունեցող քաղաքական իրավիճակի փոփոխությանը` Բոստանջյանը տեսակետ հայտնեց, որ այնտեղ ձևավորվող գործընթացները փոքր ազդեցություն ունեն Հայաստանի վրա: Ռուսաստանի շահը Հայաստանում շարունակում է նույնը մնալ: Այն հարցին, թե ինչ ազդեցություն կունենա Ռոբերտ Քոչարյանի վերադարձը հայկական քաղաքական դաշտ, Բոստանջյանը պատասխանեց, որ «ամեն ինչին չի տիրապետում, ուստի կարծիք հայտնել չի կարող»: