Իրանական Mashregh News լրատվական կայքի հաղորդմամբ, Իրանի պաշտպանության նախարար Ահմադի Վահիդին, անդրադառնալով Իրանի և ԱՄՆ-ի կառավարությունների միջև հաղորդակցական «Կարմիր հեռախոսակապ» հաստատելու գաղափարին, հայտարարել է. «Մենք տարածաշրջանում նմանօրինակ հաղորդակցության կարիքը չունենք: Միջազգային զինված ուժերի դուրս բերումը տարածաշրջանից պատճառ կդառնա, որ տարածաշրջանում խաղաղություն հաստատվի: Ամերիկացիներն ասում են, թե տարածաշրջանում Իրանի զինված ուժերի հետ սխալմամբ բախվելու մտահոգություն ունեն, իսկ մենք ասում ենք, որ Պարսից ծոցով երթևեկելու համար նրանց բոլոր ռազմանավերը պետք է պատասխանեն Իրանի ծովուժի բոլոր հարցերին ու միայն հետո անցնեն Պարսից ծոցով»։
Հիշեցնենք, որ Իրանի նախագահ Մահմուդ Ահմադինեժադը Նյու Յորքում, դրական համարելով ԱՄՆ-ի կողմից առաջարկված «Կարմիր հեռախոսակապի» ստեղծումը, այդ նախագիծը իրականացնելու պատրաստակամություն էր հայտնել:
Իրանի ՊՆ-ը, նաև անդրադառնալով C-300 հրթիռների շուրջ Իրանի ու ՌԴ միջև ծագած վեճերին, հայտնել է, որ այդ գործը իր բնականոն հունով է ընթանում, և իրենք խնդրի կարգավորումը հանձնել ենք մի երրորդ իրավարար կողմի:
