Հայաստանի Հանրապետության կրթության, գիտության, մշակույթի և սպորտի նախարար Ժաննա Անդրեասյանը կարևորում է Համահայկական ձմեռային խաղերի անցկացումը 11 տարվա դադարից հետո և հրաշալի տոնակատարություն համարում դրանց բացման արարողությունը:
«Կարծում եմ, իրոք, հրաշալի տոնակատարություն ստացվեց: Հատկապես տպավորիչ էր Ջերմուկում ունենալ այս բեմը, այս տարածքում: Շատ բարձր տրամադրություն է: Իհարկե, խոսում ենք սպորտի մասին, խոսում ենք մրցումների մասին, և հաղթանակը շատ կարևոր է, բայց ակնհայտ է, որ մասնակցությունն արդեն իսկ լուրջ հաջողություն է մասնակից մարզիկների համար»,- լրագրողների հետ զրույցում ասաց նախարարը:
Անդրեասյանի խոսքով` այս տարի Համահայկական ձմեռային խաղերին մասնակցում են նաև մարզիկներ այնպիսի երկրներից, որտեղից նախկինում չեն եղել:
«Կարևորում եմ նաև այն, որ կարողացանք ձմեռային խաղերի այս տարբերակը երկրորդ անգամ կազմակերպել, քանի որ առաջին անգամ խաղերն անցկացվել էին 11 տարի առաջ և այլևս չեն կազմակերպվել: Սպորտի ռազմավարությամբ ևս մենք առանձնահատուկ կարևորություն ենք տալիս ձմեռային մարզաձևերի զարգացմանը»,- ընդգծեց նա:
Անդրեասյանը պատրաստվում է Ջերմուկում ներկա լինել Համահայկական խաղերի մի քանի մրցումների, մասնավորապես, ձնամարտի մրցաշարին:
