Զորահանդեսներին այլ երկրի զորամիավորումների մասնակցությունը միջազգային փորձ ունի: Այսօր լրագրողների հետ հանդիպման ժամանակ նշեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը` անդրադառնալով անկախության տոնին նվիրված զորահանդեսի ժամանակ ռուսական զորամիավորումների մասնակցությանը, որը բողոքի մեծ ալիք էր բարձրացրել հայ հասարակության շրջանում:
«Սա համագործակցության, ուժի ցուցադրություն էր և ընդունված պրակտիկա շատ երկրներում»,- ասաց քաղաքագետը` հավելելով, որ սա շատ տարածված է Ֆրանսիայում: Ըստ Իսկանդարյանի՝ զորահանդեսին այլ երկրի զորամիավորման մասնակցությունը ցույց է տալիս միջպետական համագործակցությունը:
Խոսելով ներքին քաղաքականությունից` Կովկասի ինստիտուտի տնօրենն ասաց, որ բազմիցս նշել է, որ լինելու է թեժ աշուն, քանի որ ընտրություններն են առջևում:
Լրագրողի հարցին՝ ինչպիսի՞ գնահատական կտա ՀԱԿ արտահերթ ընտրությունների պահանջին՝ պատասխանեց, որ ոչ մեկ անգամ է լսել արտահերթ ընտրությունների և այլ պահանջներ ՀԱԿ կողմից և դեռ կլսի: «Ասում են, որ պետք է իշխանությունը դառնա լեգիտիմ արտահերթ ընտրությունների միջոցով: Ես պատճառ չեմ տեսնում, որ իշխանությունները գնան արտահերթ ընտրությունների, և չեմ կարծում, որ այս պահանջները լուրջ են: Սա արդեն ռիտուալ է դարձել և արտահերթ ընտրությունների հավանականությունը շատ քիչ է»,- ավարտեց իր խոսքը Կովկասի ինստիտուտի տնօրեն, քաղաքագետ Ալեքսանդր Իսկանդարյանը: