Վերջին շրջանում ղարաբաղա-ադրբեջանական հակամարտ զորքերի շփման գծում արձանագրվել է հրադադարի ռեժիմի խախտման աննախադեպ աճ:
ՊԲ օպերատիվ տվյալների համաձայն` միայն սեպտեմբեր ամսվա անցած ժամանակահատվածում ադրբեջանական բանակի առաջապահ ստորաբաժանումները АК, СВД, «Սև նետ», «Իստիգլալ», ПК, ДШК և այլ տեսակի փոքր և խոշոր տրամաչափի հրաձգային զենքերից հայկական դիրքերի ուղղությամբ արձակել են ավելի քան 6000 կրակոց` հրադադարի պահպանման ռեժիմը խախտելով շուրջ 900 անգամ: Նշված խախտումների մոտ 35 տոկոսն արձանագրվել է անցած շաբաթվա ընթացքում:
ՊԲ լրատվության և քարոզչության բաժնից հաղորդում են, որ ադրբեջանական զինուժի ձեռնարկած նախահարձակ գործողությունները հիմնականում առավել ակտիվ են եղել ԼՂՀ-ում և ՀՀ-ում անկախության տոներին նվիրված միջոցառումների նախաշեմերին, ինչը բնականաբար նպատակաուղղված է եղել որևէ կերպ ազդել տոնակատարությունների ընթացքի և, իհարկե, հայ հասարակության տրամադրության վրա:
Այդ իսկ պատճառով ՊԲ առաջապահ ստորաբաժանումները ոչ միայն ձեռնարկել են համարժեք պատասխան քայլեր, այլև ծայրահեղ անհրաժեշտության դեպքում հակառակորդին հասցրել արժանի հակահարված: