Այսօր Երևանում կայացավ ՀՀ-ԵՄ համագործակցության կոմիտեի հերթական տասներկուերորդ նիստը:
Նիստի համանախագահներն էին հայկական կողմից` ՀՀ էկոնոմիկայի նախարար Տիգրան Դավթյանը, եվրոպական կողմից` Եվրոպական արտաքին հարաբերությունների ծառայության Ռուսաստանի, «Արևելյան գործընկերության», Կենտրոնական Ասիայի տարածաշրջանային համագործակցության և ԵԱՀԿ հարցերով տնօրեն Գունար Վիգանդը:
Նիստի ժամանակ կողմերն ընդգծեցին, որ էական առաջընթաց է գրանցվել ԵՄ-Հայաստան Ասոցացման համաձայնագրի շուրջ բանակցությունների շրջանակներում, ինչպես նաև ՀՀ-ԵՄ Խորը և համապարփակ ազատ առևտրի գոտու (ԽՀԱԱԳ) բանակցությունների մեկնարկի համար նախանշված առաջնահերթությունների իրականացման ուղղությամբ` հույս հայտնելով, որ մոտ ապագայում հնարավոր կլինի ապահովել դրանց ամբողջական իրականացումը և ԽՀԱԱԳ բանակցությունների մեկնարկը:
Կողմերն անդրադարձան նաև սեպտեմբերի վերջին Վարշավայում կայանալիք «Արևելյան գործընկերության» գագաթնաժողովի օրակարգին: Նիստի օրակարգում ներառված էին նաև մարդու իրավունքներին և հիմնարար ազատություններին, տրանսպորտի և էներգետիկայի ոլորտում համագործակցությանը, Լեռնային Ղարաբաղի հիմնախնդրի կարգավորմանը, Հայաստան-Թուրքիա հարաբերություններին և ԵՄ աջակցության ծրագրերին վերաբերող հարցեր: