«Մենք դատապարտված էինք լինելու անկախ, դա մեր կամքից կախված չէր: Կայսրությունը փլուզման եզրին էր: Խնդիրն այն էր, թե ոնց է դա արվելու»,- այսօր լրագրողների հետ հանդիպման ժամանակ հայտարարեց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը` հավելելով, որ ՀՀ անկախության հանրաքվեի արդյունքների մասին չի ցանկանում խոսել տոնի նախաշեմին, բայց «ճշմարտությունն ընկերությունից վեր բան է»: Բանախոսի կարծիքով` 1991 թ. բնակչության 60%-ը դեմ էր անկախությանը, իսկ հանրաքվեին 40% է մասնակցել:
Նրա խոսքով` ՀՀ բնակչությունը 4.5 միլիոնն անցել էր` փախստականների հետ միասին, ԽՍՀՄ փլուզումից հետո 1.8 մլն դարձավ գործազուրկ, 4.5 մլրդ ռուբլի խնայողությունները դարձան 0, «կոլխոզների և սովխոզների ցրումից հետո գյուղն աղքատացավ ու մինչ օրս չի կարողանում ոտքի կանգնել»: Ա. Ադիբեկյանը նշեց, որ սեփականաշնորհումը կարելի էր տանել այնպես, որ չտուժեին մարդիկ. «Էներգետիկ համակարգերը վաճառեցինք գազի դիմաց` Հրազդանը, այսօր` Որոտանը, հետո ի՞նչ ենք վաճառելու: Մովսես է պետք, որ մեզ սովորեցնի, թե ինչպես հասնել դրախտ»:
Քաղաքական առումով, ըստ Ա. Ադիբեկյանի, ՀՀ-ն որոշ իմաստով պաշտպանում է իր դերակատարումը միջազգային ասպարեզում` Ղարաբաղի անկախության շնորհիվ, ՀՀ-ն այսօր ՌԴ «ֆորտպոստն» է, անկախության «քաղցր պտուղները չենք տեսնում»:
«Կասկածի տակ է, թե անկախությունը մեզ ավելի շատ դրակա՞ն, թե՞ բացասական բան է տվել»,- նշեց բանախոսը:
