Իսրայելի վարչապետ Բենյամին Նեթանյահուն առաջարկել է ուղիղ բանակցություններ վարել Պաղեստինի ինքնավարության ղեկավար Մահմուդ Աբբասի հետ, այլ ոչ թե «ժամանակ ծախսել միակողմանի քայլերի վրա»: Այս մասին հաղորդում է BBC-ն: «Ես Պաղեստինի ինքնավարությանը կոչ եմ անում ուղիղ բանակցություններ սկսել Նյու Յորքում (Աբբասն ու Նեթանյահուն գտնվում են Նյու Յորքում, ուր պետք է մասնակցեն ՄԱԿ-ի գլխավոր ասամբլեայի 66-րդ նստաշրջանին.- 1in.am), որոնք կշարունակվեն և՛ Երուսաղեմում, և՛ Ռամալլահում»,- ասել է Նեթանյահուն:
Սա հերթական փորձն է՝ կանխելու Պաղեստինի կողմից անկախության համար ՄԱԿ դիմելու քաղաքականությունը, ինչին դեմ է հանդես գալիս պաշտոնական Իսրայելը: Reuters գործակալությունը հաղորդում է, որ այս ֆոնին ակտիվացել է մերձավորարևելյան խաղաղության բանակցությունների քառյակը, որի ներկայացուցիչը վերջին հանդիպումները դրական և արդյունավետ է գնահատել:
