Հունվարի 12-ին Իլհամ Ալիեւը զինված ուժերի բարձրագույն հրամանատարական կազմի կադրային փոփոխությունների հրամանագիր է ստորագրել: Պահեստազոր են արձակվել գեներալ-լեյտենանտ Էնվեր Էֆենդիեւը, գեներալ-լեյտենանտ Հեյդար Փիրիեւը, գեներալ-մայոր Զաքիր Աղաեւը, գեներալ-մայոր Նամիկ Փոլադովը եւ փոխծովակալ Սուբհան Բեքիրովը: Ադրբեջանի ռազմական գերատեսչությունից պարզաբանել են, որ բարձրաստիճան զինվորականները «հասել են ծառայության համար օրենքով սահմանված պիտանելիության տարիքին»: Առնվազն մեկ՝ գեներալ-լեյտենանտ Էնվեր Էֆենդիեւի դեպքում, սակայն, հայտնի է, որ մնում է պահեստազորում:
Ալիեւի հրամանագրի ինտրիգն, ըստ էության, հենց կապված է Էֆենդիեւի հետ. նա ազատվել է պաշտպանության փոխնախարարի, ցամաքային զորքերի հրամանատարի պաշտոնից: Մեկ այլ հրամանագրով պաշտպանության փոխնախարար եւ ցամաքային զորքերի հրամանատար է նշանակվել գեներալ-լեյտենանտ Հիքմեթ Միրզոեւը, որ մինչ այդ զբաղեցնում էր հատուկ նշանակության զորամիավորման հրամանատարի պաշտոնը:
Բաց աղբյուրների տեղեկություններով՝ Միրզոեւը ծնվել է 1968թ.-ին, Ադր.ԽՍՀ Պուշկինո (ներկայիս Բիլասուար) ավանում: Ավարտել է Բաքվի համազորային բարձրագույն ռազմական ուսումնարանը, ծառայել խորհրդային բանակում: Ղարաբաղյան առաջին պատերազմում գլխավորել է «խորքային հետախուզության» ստորաբաժանում: Քառասունչորսօրյա պատերազմին մասնակցել է որպես հատուկ նշանակության միավորման հրամանատար, նրան է վերագրվում Շուշիի գրավման ռազմագործողության մշակումը եւ իրականացումը:
Մինչ այս նշանակումը Բաքվի քարոզչությունը «Ղարաբաղի հերոս» էր անվանում բանակային կորպուսի հրամանատար Մաիս Բարխուդարովին: Ալիեւի հրամանագիրն այդ աուրայում լեգալացրել է Հիքմեթ Միրզոեւին, որ երկրորդ ռազմական կրթությունն ստացել է Թուրքիայի ԶՈՒ Գլխավոր շտաբի ակադեմիայում: Ըստ ամենայնի, հատուկ նշանակության զորախմբի հրամանատարի նրա կարիերան, ինչպես նաեւ պաշտպանության փոխնախարարի պաշտոնին նշանակումը պայմանավորված են Թուրքիայում զինվորական պատրաստություն անցնելու հետ:
Այդ կապը եւ Հիքմեթ Միրզոեւի շուրջ քարոզչական լեգենդի քաղաքական հետագիծը շատ պարզ դիդարկվում է. նրա նշանակման հաջորդ օրը պաշտպանության նախարար Զաքիր Հասանովը գործուղվել է Անկարա, որտեղ լրագրողներին հակիրճ ասել է, որ «ադրբեջանական բանակի թուրքական չափանիշներով վերակառումը մնում է սկզբունքային նպատակ եւ շարունակվում է»: Ավելի վաղ թուրքական բանակի խորհրդանիշ էր համարվում գեներալ Հաշիմովը, որ ոչնչացվեց Տավուշի մարտերի ժամանակ:
Տեղական հեռուստաընկերություններին հարցազրույցում Իլհամ Ալիեւը բաց հայտարարեց, որ Հայաստանից ռազմական լուրջ սպառնալիքի դեպքում «կանխարգելիչ հարվածներ կհասցվեն»: Քիքմեթ Միրզոեւի փոխնախարար նշանակվելու հաջորդ օրը Բաքվի լրատվամիջոցները լայնորեն անդրադարձել են հատուկ նշանակության ուժերի զորավարժությունը, որի իմաստը «պայմանական հակառակորդի պաշտպանական գիծը ճեղքելը եւ հրամանատարական կետի ոչնչացումն է»:
Հավանական է, որ Ալիեւը ընտրի «սողացող պատերազմի» մարտավարություն, երբ լայնածավալ ռազմական գործողություններ չեն ընթանա, բայց հայ-ադրբեջանական սահմանի երկայնքով կամ առանձին հատվածներում լարվածությունը մշտապես կպահպանվի: Ուշագրավ է, որ Ալիեւը խոսել է Տավուշ-Ղազախ հատվածում «սահմանազատում անցկացնելու» մասին: Ըստ երեւույթին, հունվարի վերջին նախատեսված՝ սահմանազատման հարցերով հանձնաժողովների հանդիպումը բարդ է լինելու: Ալիեւը կարող է դնել առնվազն, իր արտահայտությամբ՝ «ոչ անկլավային գյուղերի» եւ լոկալ «սահմանազատման» հարց: Նա արտահերթ ընտրությունների է գնում «ազգի առաջնորդի» մանդատ ստանալու նպատակադրվածությամբ: Հիքմեթ Միրզոեւի լեգենդը այդ քարոզչության ռազմական բաղադրիչն է:
