ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է նորվեգական «Նորսկ էներջի» ընկերության պատվիրակությանը:
Քննարկվել են Նորվեգիայի արտգործնախարարության ֆինանսական աջակցությամբ «Նորսկ էներջի» ընկերության կողմից Հայաստանում իրականացվելիք փոքր հիդրոէներգետիկայի զարգացման ծրագրին առնչվող հարցեր: Եռամյա ծրագիրը ոլորտի զարգացումը դիտարկում է բնապահպանական կայունության և էներգետիկ անվտանգության տեսանկյունից:
Ծրագրի շրջանակում նախատեսվում է ստեղծել աշխատանքային խումբ` Հայաստանում ոլորտին վերաբերող օրենսդրական դաշտի կատարելագործման և նոր չափորոշիչների ներդրման խնդիրների ուսումնասիրման նպատակով: Ծրագիրը ներառում է նաև կրթական բաղադրիչ. նորվեգական ու հայաստանյան բուհերի համագործակցությամբ նախատեսվում է իրականացնել ոլորտի մասնագետների պատրաստման ծրագիր, ինչպես նաև ստեղծել կենտրոն, որտեղ հնարավոր կլինի մասնագետների վերապատրաստում իրականացնել:
Փոխվարչապետը ողջունել է նախաձեռնությունը` նշելով, որ փոքր հիդրոէներգետիկայի զարգացման և էներգետիկ ռեսուրսների դիվերսիֆիկացման խնդիրները կառավարության գերակայություններից են: ՀՀ կառավարության նախորդ նիստում հաստատվել է ՀՀ «Հիդրոէներգետիկայի ոլորտի ռազմավարական զարգացման ծրագիրը», որտեղ ամրագրվել են ոլորտի զարգացման ուղղությամբ կառավարության նպատակները, և այս համատեքստում իրականացվելիք ծրագիրն ու ոլորտում նորվեգական հարուստ փորձի ուսումնասիրումը օգտակար կլինեն:
Աշխատանքային խմբում նա առաջարկել է ընդգրկել շահագրգիռ գերատեսչությունների, ինչպես նաև ՀԿ-ների ներկայացուցիչներին:
Ա. Գևորգյանը նաև կառավարության անունից պատրաստակամություն հայտնեց աջակցություն ցուցաբերել ծրագրի իրականացմանը: