Շաբաթ օրը տարածված տեղեկատվությունը, թե Ուրուգվայի արտգործնախարարը հայտարարել է, որ ինքը համոզված է, որ Լեռնային Ղարաբաղը Հայաստանի պատմական մաս է և պետք է լինի անկախ կամ կարճ ժամանակահատվածում կցվի Հայաստանին, ինչպես նաև շեշտել է, թե Ուրուգվայն ուսումնասիրում է հարցը` «պետականորեն տեսակետ հայտնելու համար», տարաբնույթ մեկնաբանությունների տեղքի տվեց:
Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը «Առաջին լրատվական»-ի հետ զրույցում նշեց, որ հայտարարության թարգմանության մեջ է սխալ եղել: Նրա խոսքերով՝ թեև այդ հայտարարության մեջ հայամետ դիրքորոշում կա, սակայն այնտեղ հստակ նշված չի եղել ճանաչման հարցը. «Պարզապես Ուրուգվայի արտգործնախարարը նշել է, որ Ուրուգվայն այժմ պետք է գնահատի իր արտաքին քաղաքականությունը՝ հայ-ադրբեջանական հակամարտության վերաբերյալ»:
Կիրակոսյանը նկատեց, որ Ուրուգվայը, որպես երկիր, միշտ էլ բարեկամական հարաբերություններ է ունեցել Հայաստանի հետ, քանզի այնտեղ բավականին մեծ հայկական համայնք կա, սակայն նա հավանական չհամարեց, որ Ուրուգվայը կարող է ճանաչել Լեռնային Ղարաբաղի անկախությունը և դրանով իսկ դեմ գնալ Ադրբեջանին:
