Իտալացի աշխարհահռչակ երգիչ Ռոբերտո Լորետտին հոկտեմբերի 23-ին ելույթ կունենա Արամ Խաչատրյան համերգասրահում:
Երգչին մեծ համբավ բերեցին հատկապես նեապոլիտանական երգերի մշակումները, ճանաչում`«Ավե Մարիա», «Ջամայկա», «Իմ արև», «Մայրիկ», «Սանտա Լուչիա» երգերի կատարումները:
Ռոբերտո Լորետտին ծնվել է 1947 թ. Հռոմում, բազմազավակ ընտանիքում: Դեռ վաղ հասակում նկարահանվել է «Աննա» և «Դոն Կամիլլոյի վերադարձը» ֆիլմերում: 6 տարեկանից երգել է եկեղեցական երգչախմբում, 8 տարեկանից արդեն երգել է Հռոմի օպերային թատրոնում:
Նրա կարիերային մեծապես նպաստել է դանիացի պրոդյուսեր Սայր Վոլմեր-Սերենսենը, որը, լսելով երգչի «Օ սոլե միո» կատարումը, հրավիրեց նրան Դանիա, որտեղ երգիչը, մեկ շաբաթ անց ելույթ ուհնենալով TV i Tivoli հեռուստաշոուում, ձեռք բերեց համաշխարհային հռչակ, իսկ O Sole mio սինգլը դարձավ ոսկյա:
Իտալիայում նրան համեմատում են Բենիամինո Ջիլիի հետ, իսկ ֆրանսիական մամուլը նրան համարում է «նոր Կարուզո»:
1973 թ. Լորետտին որոշեց թողնել երգարվեստն ու սկսեց զբաղվել կինոպրոդյուսերությամբ և կոմերցիայով, սակայն 1982 թ. կրկին սկսեց հյուրախաղերով հանդես գալ: Մինչ օրս էլ նա շարունակում է համերգային շրջագայություններ ու նոր ձայնագրություններ կատարել:
