Հայաստանում անցած տարի հոկտեմբերին անցկացված մարդահամարի արդյունքներով Հայաստանի մշտական բնակչության թիվը կազմել է 2 միլիոն 928 հազար 914 մարդ։ Թվի մեջ ներառված են նաև մարդիկ, որոնք Հայաստանում են բնակվում, սակայն մարդահամարի պահին մինչև մեկ տարի ժամկետով բացակայել են Հայաստանից։
2001 թվականի մարդահամարի տվյալներով` Հայաստանի մշտական բնակչության թիվը կազմել է 3 միլիոն 213 հազար 11 մարդ, իսկ առկա բնակչության թիվը՝ 3 միլիոն 2 հազար 598 մարդ։
2011 թվականի մարդահամարի տվյալներով՝ Հայաստանի մշտական բնակչության թիվը կազմել է 3 միլիոն 18 հազար 854 մարդ, իսկ առկա բնակչության թիվը՝ 2 միլիոն 871 հազար 771 մարդ։
ՀՀ վիճակագրական կոմիտեի մարդահամարի և ժողովրդագրության բաժնի պետ Կարինե Կույումջյանն «Առաջին լրատվական»-ի հետ զրույցում նշեց, որ սրանք նախնական օպերատիվ տվյալներն են, որոնք հրապարակել ենք, ավելին երբ լինի, հանրությանը կտեղեկացնենք.«Սրանք նախնական ցուցանիշներն են, և հաջորդող էտապներով մինչև տարեվերջ տվյալների ամբողջ ցանկը կներկայացվի հանրությանը»,-ասաց Կույումջյանը։
Ժողովրդագրագետները աղետալի ցուցանիշներ են համարում։ Կույումջյանը, անդրադառնալով այդ գնահատականներին, նշեց.
«Գիտեք՝ վիճակագրությունն իր գործառույթներն անում է, փաստագրում է, հաշվարկում է և ներկայացնում հանրությանը, և մնացած բոլոր ածականները, որ դրվում են թվերի կողքին, այդ մարդկանց ուսումնասիրությունների, հետազոտությունների վերաբերյալ որևէ բան ասել, քանի որ սա մեր գործառույթը չէ»,-ասաց նա։
Կույումջյանի խոսքով՝ այնպես չէ, որ նախորդ մարդահամարների կամ այլ երկրների մարդահամարների ցուցանիշներով ներառված չեն ժամանակավորապես երկրից բացակայող բնակչությունը կամ առկա բնակչության թվաքանակի մեջ ներառված չեն երկրում տվյալ պահին գտնվողները։
«Այսինքն՝ այս կառուցվածքը միջազգային ընդունված մեթոդաբանությամբ է հաշվարկված, իսկ մնացած բնութագրիչները՝ ողբերգական, կամ աղետալի, դրանց վերաբերյալ ոչինչ չեմ կարող արվել»,-ասաց նա։
Կույումջյանը նաև նշեց, որ այս անգամվա մարդահամարն իր բնույթով տարբերվում է, որովհետև ինքը համակցված մեթոդով է իրականացված, այսինքն՝ օգտագործվել են նաև պետական ռեգիստրի և սահմանային էլեկտրոնային կառավարման տեղեկատվական համակարգի տվյալները, որոնք ծրագրային ապահովումով միավորվել են իրար հետ, որը հնարավորություն է տվել երկրում գտնվող բնակչության թվաքանակի մասին տեղեկատվություն ունենալ, ինչպես նաև բացակայողների ժամկետների վերաբերյալ տեղեկատվություն ունենալ, դրան համակցվել է մեր հասցեների 25 տոկոսում իրականացված հարցախույզը մարդահամարի ծրագիրը. բնութագրիչների տվյալները կներկայացվի հանրությանը տարեվերջին։ «Մինչև տարեվերջ հնարավոր է վիճակագրության տեսքով ներկայացնենք»,-հավելեց նա։
