Թեև վարչապետ Նիկոլ Փաշինյանը հանձնարարել էր համապատասխան գերատեսչությունների ղեկավարներին, որ եղանակային կտրուկ անկման պայմաններում ցրտահարումներ չլինեն կամ նվազագույն աստիճանի հասցվեն, այնուամենայնիվ, Արարատյան հարթավայրում տեղեր կան 30 տոկոս, տեղեր կան մինչև 60-70 տոկոս ցրտահարություն ունենք:
Ապահովագրական ընկերություններից մեկից ստացված տվյալների համաձայն՝ շարունակում են իրականացվել հետազոտություններ, թե քանի տնտեսություն է տուժել ցրտահարությունից։
«Հետազոտությունը ընթացքի մեջ է։ Այցելությունները նախատեսված են ահազանգերից հետո 15 օրվա ընթացքում»,-«Առաջին լրատվական»-ի հետ զրույցում նշեցին ընկերությունից։
Մեզ նաև տեղեկացրին, որ հազար տնտեսությունից մի փոքր ավել ահազանգել են ցրտահարության վերաբերյալ։ Արմավիրի և Արարատի մարզի գրեթե բոլոր համայնքները, ինչպես նաև որոշ համայնքներ Արագածոտնի մարզից տուժել են ցրտահարությունից։ Ի դեպ, հիմնականում ահազանգերը վերաբերում են ծիրանենու մշակաբույսին, սակայն վնասի աստիճանի մասին տեղեկատվություն առայժմ առկա չէ։
