Էկոնոմիկայի նախարար Վահան Քերոբյանն անդրադարձել է հնարավոր ցրտահարությանը և ձեռնարկվող միջոցառումներին։ Նրա խոսքով՝ եթե գյուղացին չապահովագրի բերքը, կա՛մ պետք է ծխածածկույթով պատի դաշտը, կա՛մ իմանա՝ ցրտահարվելու է։ Կառավարությունը հորդորում է ավելի գրագետ վարել իրենց տնտեսությունները, ֆերմերային տնտեսությունները նույնպես բիզնես են, իսկ բիզնեսի մեջ կան ռիսկեր, իսկ գլխավոր ռիսկը եղանակային պայմաններն են։ Հետևաբար ճիշտը բերքն ապահովագրելն է, հատկապես, որ գուղապահովագրության համակարգի կայացումը սուբսիդավորում են:
Գյուղատնտեսության նախկին փոխնախարար, գյուղատնտես Գառնիկ Պետրոսյանը «Առաջին լրատվական»-ի հետ զրույցում նշեց, որ գյուղապահովագրությունը շատ կարևոր է, որը պետությունը լուծեց, բայց շատ կարևոր է, որ բերքի ապահովագրություն կատարվի կամ եկամուտների, որը հետաքրքրություն կառաջացնի. «Գյուղատնտեսության ոլորտում դժվար է վնասի չափերը ճշտել, շատ հաճախ չենք ունենում իրական պատկերը: Միայն ծախսերի ապահովագրմամբ հաջողության չենք հասնի, կարևոր է նաև բերքի կամ եկամուտի ապահովագրությունը»:
