Ադրբեջանի արտգործնախարարության մամուլի ծառայության ղեկավար Այխան Հաջիզադեն խստորեն դատապարտել է Հայաստանում Եվրամիության քաղաքացիական առաքելության ղեկավար Մարկուս Ռիթերի հայտարարությունը, որ հայերի կարծիքով՝ Ադրբեջանը հարձակման է պատրաստվում 2023 թվականի գարնանը։
«Մենք խստորեն դատապարտում ենք այն փաստը, որ ԵՄ քաղաքացիական առաքելության ղեկավարը, հիմնվելով հայկական կողմի կեղծ և զրպարտչական հայտարարությունների վրա, կարծիք է հայտնել, որ Ադրբեջանն իբր պատրաստվում է հարձակման, և ներկայացրել, թե ԵՄ առաքելության հիմնական խնդիրը Հայաստանը Ադրբեջանից պաշտպանելն է», – ասել է Հաջիզադեն:
«Մենք բազմիցս ընդգծել ենք այս առաքելության չարաշահումները կանխելու անհրաժեշտությունը՝ ուղղված Ադրբեջանի և Հայաստանի միջև հարաբերությունների կարգավորման գործընթացը խաթարելուն», – նշել է Ադրբեջանի ԱԳՆ խոսնակը իր մեկնաբանության մեջ։
Նրա խոսքով՝ «ԵՄ առաքելությունը չպետք է ենթարկվի կեղծ ու զրպարտչական հայտարարություններին և պետք է գործի իր մանդատի համաձայն»։
Հայաստանում ԵՄ քաղաքացիական առաքելության ղեկավարը, մինչդեռ, ոչ թե ասել է, որ Ադրբեջանը պատրաստվում է հարձակման, այլ՝ «շատ հայեր կարծում են, որ Ադրբեջանի կողմից գարնանը հարձակում կլինի»: «Եթե դա տեղի չունենա, մեր առաքելությունն արդեն հաջողված է», – ընդգծել է Ռիթերը:
Քաղաքագետ Անդրիաս Ղուկասյանը հիշեցնում է՝ մարտի 15-ին Եվրախորհրդարանն ընդունեց բանաձևեր Հայաստանի և Ադրբեջանի հետ հարաբերությունների վերաբերյալ. «Ըստ այդ բանաձևերի՝ այն մասը, որը վերաբերում է արցախյան կարգավորմանը, որը նույնաբովանդակ է երկու բանաձերի մեջ, ներառում է 29 կետ։ Սրանցից, իմ կարծիքով, կարևորն այն է, որ Եվրամիության 27 պետությունները գտնում են, որ Արցախի կարգավիճակը պետք է որոշվի ու ճանաչում են ինքնորոշման իրավունքի սկզբունքը որպես կարգավորման համար գլխավոր սկզբունքներից մեկը, ի թիվս ուժի չգործադրման ու տարածքային ամբողջականության հարգման սկզբունքների։ Համարում են, որ կարգավորումը պետք է լինի «Մադրիդյան սզկբունքների» հիման վրա, այսինքն՝ հանրաքվեի միջոցով որոշվի Արցախի կարգավիճակը, նաև համարում են, որ հայերը պետք է հետ վերադառնան վերջին պատերազմի արդյունքում իրենց լքված տները։ Խոսքը գնում է ոչ միայն Արցախի տարածքի՝ Շուշիի, Հադրութի, նախկին ԼՂԻՄ-ի տարածքի, այլ նաև Քարվաճառի տարածքի մասին»,-«Առաջին լրատվական»-ի հետ զրույցում ասաց նա։
Ըստ Ղուկասյանի՝ Եվրոպական միությունը դատապարտել է Ադրբեջանի ագրեսիան Հայաստանի դեմ, արձանագրել է, որ Ադրբեջանն է սանձազերծել 2020 թվականի պատերազմը, Ադրբեջանից խստորեն պահանջել էր և՛ վերականգնել Լաչինի միջանցքի ազատ աշխատանքը, և՛ վերադարձնել նաև հայ գերին, զերծ մնալ ռազմական ուժի դրսևորումներից.«Այս ամբողջն իհարկե զարյույթ պետք է առաջանար Ադրբեջանում։ Բնականաբար առաջացան այդ մտահոգությունները, որ Եվրամիության կողմից ընդունված բանաձևեին ի պատասխան, Ադրբեջանը նորից կարող է սանձազերծել պատերազմ։ Դրանով է պայմանավորված առաքելության ղեկավարի հայտարարությունը՝ առ այն, որ այդ առաքելության նպատակն է Ադրբեջանին զուսպ պահել և ըստ էության Ադրբեջանին արդեն մատնացույց է արված, որ Ադրբեջանի ղեկավարը հայտնվում է Կոսովոյի սցենարի ներքո և որ միջազգային հանրությունն ու եվրոպական պետությունները ներկայացնում են պահանջ։ Եթե ավտորիտար ղեկավարությունն այդ պահանջը չի կատարում, ապա որոշ ժամանակ անց արդեն տեղի է ունենալու ռազմական, ուժային միջամտություն»։
Մեր այն դիտարկմանը, թե Եվրամիության դիտորդական առաքելության տեղակայումից ի վեր առաջին զոհն արդեն Երասխի ուղղությամբ եղել է, ինչպիսի՞ մարտավարություն պետք է ցույց տա ԵՄ-ն, քաղաքագետն արձագանքեց. «Այս ամենը այն փաստային հիմքերն են, որ Եվրամիության պետությունների կողմից բերելու են ռազմական միջամտության»,-եզրափակեց նա։