Թուրքական Milliyet թերթի փոխանցմամբ՝ Ստամբուլի «Ֆեներբահչե» ֆուտբոլային ակումբը դատի է տվել ՈՒԵՖԱ-ին և Թուրքիայի ֆուտբոլի ֆեդերացիային (ԹՖՖ)։ «Ֆեներբահչե»-ն դիմել է Մարզական արբիտրաժային դատարան՝ 2011/12 մրցաշրջանում իրեն Չեմպիոնների լիգայի խաղարկությանը մասնակցելու իրավունքից զրկելու համար։
Ակումբը հայտարարել է, որ դրա արդյունքում իրենց ֆինանսական վնասը կազմել է 45 միլիոն եվրո, ինչի համար ակումբը պետք է փոխհատուցում ստանա։ Ուշագրավ է, որ ավելի վաղ ստամբուլյան ակումբի ներկայացուցիչները հայտարարել էին, որ Չեմպիոնների լիգային չմասնակցելու պատճառով ակումբը կորցնելու է 25 միլիոն եվրո։
Հիշեցնենք, որ ՈՒԵՖԱ-ն և ԹՖՖ-ն «Ֆեներբահչե»-ին զրկել են Չեմպիոնների լիգայի խաղարկությանը մասնակցելու իրավունքից, քանի որ այն ներքաշված է եղել վերջին շրջանում Թուրքիան ցնցած պայմանավորված խաղերի սկանդալում։